«Damoŭlenaści z Vašynhtonam — šlach da likvidacyi Biełarusi jak dziaržavy». Što rasijskija ŚMI pišuć pra vizit Pampiea
Rasijskija ŚMI źviarnuli ŭvahu na vizit dziaržaŭnaha sakratara ZŠA Majka Pampiea ŭ Minsk. Asabliva burna rasijskija žurnalisty i prapahandysty adreahavali na słovy Pampiea pra hatoŭnaść zabiaśpiečyć Biełaruś amierykanskaj naftaj. «Naša Niva» sabrała dla vas asnoŭnyja publikacyi ŭ rasijskich ŚMI na hetuju temu.
«Kommiersant»: Śledam za Ukrainaj ZŠA sprabujuć adarvać ad Rasii byłyja savieckija respubliki
Pieršaje ŭ novym hodzie vialikaje zamiežnaje turne kiraŭnika dypłamatyi ZŠA prademanstravała rašučy pavarot Vašynhtona nasustrač najbližejšym chaŭruśnikam Maskvy, paviedamlaje «Kommiersant».
«Pieramovy Majka Pampiea pakazali: śledam za Ukrainaj ZŠA sprabujuć adarvać ad Rasii byłyja savieckija respubliki, jakija ŭvachodziać u intehracyjnyja abjadnańni ŭ zonie jaje stratehičnych intaresaŭ», — piša rasijskaje vydańnie.
Całkam heta vyjaviłasia padčas vizitu dziaržsakratara Pampiea ŭ Minsk, jaki praciahvaŭsia mienš za dzień, ale jaki mieŭ vielizarnaje značeńnie dla abodvuch bakoŭ, adznačaje «Kommiersant».
Vydańnie piša, što amierykanskaja nafta, pra jakuju kazaŭ Majk Pampiea, nie zmoža stać paŭnavartasnaj alternatyvaj nafcie z Rasii z-za vysokaj cany. Pa słovach Dźmitryja Marynčanki z Fitch, zdabyčaj nafty ŭ ZŠA zajmajucca pryvatnyja kampanii, nijakich niarynkavych skidak jany dla Biełarusi dakładna rabić nie buduć — tamu amierykanskaja nafta, asabliva z ulikam transpartnaha plača, budzie daražejšaj za rasiejskuju.
Vielmi vierahodna, što Rasija zastaniecca kali nie adzinym, to, prynamsi, samym bujnym pastaŭščykom nafty ŭ Biełaruś u ahladnaj budučyni, ličyć apytany vydańniem ekśpiert.
RBK: Vizit Pampiea ŭ Minsk źjaŭlajecca centralnym
Centralnaj padziejaj turne Pampiea staŭ vizit u Biełaruś, piša RBK.
Vizit prachodziŭ na fonie kryzisu ŭ adnosinach Minska i Maskvy. Im da hetaha času nie ŭdałosia ŭzhadnić umovy pastaŭki nafty ŭ Biełaruś.
ZŠA bačać składanaści ŭ adnosinach Minska i Maskvy i nie mohuć prapuścić hety momant; ale pakul što słovy pra poŭnaje zamiaščeńnie rasijskaj roli ŭ pastaŭkach enierharesursaŭ nie mohuć ažyćciavicca, upeŭnieny dacent RHHU Alaksandr Huščyn. Dla Maskvy vizit Pampiea — surjozny zvanok, Łukašenka budzie vykarystoŭvać jaho jak kozyr u pieramovach z Rasiejaj, upeŭnieny ekśpiert, apytany RBK.
«RIA Novosti»: «U amierykancaŭ dumka prostaja: adarvać Biełaruś ad Rasiei»
Jašče da pryjezda Bołtana ŭ Minsk «RIA Novosti» apublikavali kamientar doktara palityčnych navuk prafiesara Rasijskaj akademii navuk Alaksandra Husieva.
«Mnie zdajecca, Łukašenka razhladaje hety vizit bolš jak ekanamičny, čym palityčny. A dla ZŠA heta palityčny vyklik, pierš za ŭsio — Rasii. Tamu što ŭsie vydatna razumiejuć, što Biełaruś — heta farpost Rasii, i ŭsie zvykli tak ličyć. Dla Pampiea vielmi važna prazandavać hlebu, daviedacca nastroi biełarusaŭ, ahulnuju situacyju ŭ krainie, prajecyjujučy ŭsio heta na Rasieju», — skazaŭ ekśpiert u hutarcy z «RIA Novosti».
Dla amierykancaŭ hety vizit važny, bo jany ličać, što Biełaruś addalajecca ad Rasiei, adznačyŭ ekśpiert.
«U amierykancaŭ dumka prostaja: adarvać Biełaruś ad Rasiei. A Łukašenka pierš za ŭsio šukaje tannuju naftu i haz za miežami Rasii — absalutna prahmatyčnyja mety. Jon šukaje pastaŭščykoŭ. Łukašenka ciapier pamiž mołatam i kavadłam, dla jaho vielmi važna znajści pastaŭščykoŭ, jon šukaje pa ŭsim śviecie — i AAE, i ZŠA, i inšyja krainy. Ja dumaju, pryjezd Pampiea absalutna nievypadkovy. Amierykancy ž zajaŭlali, što jany buduć addalać krainy Centralnaj i Siaredniaj Azii ad krainy. A ciapier Biełaruś», — padkreśliŭ jon.
«Novaja hazieta»: ZŠA ŭsurjoz prychodziać u postsaviecki rehijon
Subotni vizit u Minsk — heta tolki častka vialikaj jeŭrazijskaj pajezdki dziaržsakratara ZŠA, piša «Novaja hazieta». Ale heta vielmi važnaja padzieja i dla Biełarusi, i dla inšych krain. Hetaja pajezdka — śviedčańnie taho, što ZŠA narešcie ŭsurjoz prychodziać u postsaviecki rehijon.
«Raniej jany zastavalisia śfieraj upłyvu Rasii, zatym imi zacikaviŭsia Kitaj i pačaŭ davoli ahresiŭnyja ekanamičnaje zasvajeńnie rehijonu. Ciapier ža svaju ŭvahu na situacyju ŭ postsavieckich krainach surjozna źviarnuli Złučanyja Štaty, a heta značyć, što rehijon stanovicca polem dla samych surjoznych suśvietnych hulcoŭ», — piša vydańnie.
RT: «Damoŭlenaści z Vašynhtonam — šlach da likvidacyi Biełarusi jak dziaržavy»
Apytanyja RT ekśpierty ličać, što ZŠA zacikaŭlenyja ŭ asłableńni suviaziaŭ pamiž Biełaruśsiu i Rasijaj. Jany pałochajuć, što supracoŭnictva z Vašynhtonam moža vyklikać žachlivyja nastupstvy.
Majk Pampiea — nie pieršy vysokapastaŭleny amierykanski čynoŭnik, jaki naviedvaje Biełaruś u čas prezidenctva Donalda Trampa, zaŭvažajuć prapahandysty.
U razmovie z RT dyrektar Centra hieapalityčnych ekśpiertyz Valeryj Karovin zajaviŭ, što aktyvizacyja palityki ZŠA na biełaruskim kirunku, vynikam jakoj staŭ pieršy za bolš čym čverć stahodździa vizit dziaržsakratara ZŠA ŭ Minsk, moža być vyklikanaja «realnaj pierśpiektyvaj stvareńnia novaj sajuznaj dziaržavy Rasii i Biełarusi».
Na dumku ekśpierta, u Vašynhtonie mahli mienavita takim čynam interpretavać i kanstytucyjnyja źmieny, pra jakija ŭ pasłańni Fiederalnamu schodu zajaviŭ prezident Rasii.
«U vyniku kanstytucyjnych źmianieńniaŭ u Rasii moža skłaścisia dosyć raŭnavažkaja, razhrupavanaja sistema ŭłady, što adkryvaje mahčymaść dla raŭnapraŭnaha sajuza Rasii i Biełarusi. ZŠA ž stvareńnie takoha novaha hieapalityčnaha subjekta ŭsprymajuć jak pahrozu», — zajaviŭ Valeryj Karovin.
Biełarusi nie varta spadziavacca, što z dapamohaj ZŠA jana ŭmacuje svoj suvierenitet, adznačaje ekśpiert. Prykład Ukrainy pakazvaje, što vynik moža być procilehłym.
«Łukašenku padmanuć, pryčym padmanuć samym žorstkim čynam. Jon nie tolki nie atrymaje nafty pa tych cenach, pa jakich choča, — jany naohuł ničoha nie atrymajuć. Navošta amierykancam biełaruskija naftapradukty na jeŭrapiejskim rynku, kali hety vydatny rynak moža być zapoŭnieny samimi amierykancami? Heta mahčyma, tolki kali biełaruskaja naftavaja pradukcyja budzie całkam pradadzienaja amierykanskim mahnatam», — ličyć Valeryj Karovin.
Na dumku palitołaha, lubyja novyja damoŭlenaści Minska z Vašynhtonam ciapier — heta šlach da «likvidacyi Biełarusi jak suvierennaj dziaržavy».
Na dumku prafiesara NDU VŠE Dźmitryja Jaŭstafjeva, uzmacnieńnie ŭzajemadziejańnia na amierykanskich umovach nosić u sabie dla Minska «ŭkrainski varyjant raźvićcia dziaržaŭnaści i ekanomiki». Abiacańniam Pampiea, pavodle jaho słoŭ, nie varta vieryć.
«Heta absalutna manipulatarnyja rečy, nakiravanyja na toje, kab adarvać Biełaruś ad Rasiei i prymusić Alaksandra Łukašenku zrabić palityčnyja zajavy, jakija vyvieduć jaho za liniju nieviartańnia ŭ adnosinach z Maskvoj», — zajaviŭ u kamientary RT Jaŭstafjeŭ.
«Ukraina.ru»: Amierycy chaciełasia b «dadać Biełaruś u łancuh rusafobskich režymaŭ»
Adreahavaŭ na vizit Pampiea ŭ Minsk i sajt «Ukraina.ru», jaki naležyć rasijskamu dziaržaŭnamu infarmacyjnamu ahienctvu «Rośsija siehodnia», hienieralnym dyrektaram jakoha źjaŭlajecca prapahandyst Dźmitryj Kisialoŭ.
Kałumnist vydańnia Raścisłaŭ Iščanka piša, što Łukašenka i Makiej vidavočna čakali ad vizitu Pampiea bolšaha.
«Pryčym, miarkujučy pa ŭsim, Makiej abiacaŭ Łukašenku praryŭ na Zachad. Baćka ŭ nachabnaj formie admoviŭsia ad im ža vyprašanaha vizitu ŭ Sočy, nahavaryŭ pra Rasieju i jaje kiraŭnictva ceły miech hadaściaŭ, adkryta daŭ zrazumieć Pampiea, što hatovy pieraaryjentavacca na ZŠA, i mieŭ raźličvać na ŭzajemnaść. A ŭ vyniku Pampiea tolki paabiacaŭ viarnuć amierykanskaha ambasadara ŭ Minsk (amierykancy sami hetaha damahalisia 12 hadoŭ, tamu heta navat nie krok nasustrač) i z metaj padtrymańnia biełaruskaha suvierenitetu pradać Baćku darahuju amierykanskuju naftu. Što ž tyčycca pytańnia antybiełaruskich sankcyj, to Pampiea zajaviŭ, što ZŠA pakul što nie hatovyja ich admianić», — piša sajt.
Aŭtar paraŭnoŭvaje Łukašenku z partyzanam, jaki «i tavaryšam zdradziŭ, i karovy jamu niemcy nie dali».
Iščanka ŭpeŭnieny, što spačatku płanavałasia značna bolš ciopłaje spatkańnie i Pampiea padavaŭ adpaviednyja nadziei.
«Inakš aściarožny Łukašenka i nie mienš aściarožny Makiej nie pajšli b na takuju demanstratyŭnuju sprobu sieparatnaj zmovy va ŭron Rasii», — piša «Ukraina.ru».
Iščanka ličyć, što Amierycy chaciełasia b «dadać Biełaruś u łancuh rusafobskich režymaŭ».
«Ale navučanyja horkim ukrainskim vopytam ZŠA razumiejuć, što tannaj źmienaj režymu ŭsio nie zakančvajecca, a tolki pačynajecca», — piša aŭtar.
TASS: Ništo nie źmienić fundamient adnosin pamiž Rasijaj i Biełaruśsiu
Ni Złučanyja Štaty, ni Jeŭropa nie mohuć źmianić fundamientalnuju kanfihuracyju adnosin pamiž Rasijaj i Biełaruśsiu. Takoje mierkavańnie ŭ subotu ŭ razmovie z karespandentam TASS vykazaŭ staršynia Savieta fondu Mižnarodnaha dyskusijnaha kłuba «Vałdaj» Andrej Bystrycki.
Pry hetym ekśpiert adznačyŭ, što Alaksandr Łukašenka pahružany ŭ svaju ŭnutrypalityčnuju biełaruskuju prablematyku, jakaja, pavodle jaho słoŭ, źjaŭlajecca vielmi niaprostaj.
Kažučy pra toje, ci značyć hety vizit, što Vašynhton sprabuje pieraciahnuć Minsk na svoj bok, kab stvaryć jašče adzin centr cisku na Rasiju, jak z Ukrainaj, analityk adkazaŭ admoŭna.
«Ja dumaju, što ZŠA pravodziać bolš dyviersifikavanuju palityku i sprabujuć pierahledzieć mnohija adnosiny. Jany pierahledzieli adnosiny i z Paŭnočnaj Karejaj, taksama, dumaju, i tut», — dadaŭ jon.
Bystrycki taksama źviarnuŭ uvahu na słovy Pampiea pra toje, što jaho vizit nie nakiravany suprać Rasiei.
«Tamu ja nie dumaju, što heta suprać Rasii. Prosta niekatorym čynam i Pampiea, i [prezident ZŠA Donald] Tramp pravodziać niekatoruju reviziju źniešniepalityčnych aryjentacyj», — dadaŭ jon.
Razvažajučy pra toje, ci zmoža vizit amierykanskaha dziaržsakratara adbicca na Sajuznaj dziaržavie, ekśpiert taksama vykazaŭsia admoŭna.
«Niezavisimaja hazieta»: Urok z Ukrainaj, mabyć, ničomu nas nie navučyŭ
Voś, što pa vyniku vizitu Pampiea ŭ Minsk piša «Niezavisimaja hazieta»:
«Urok z Ukrainaj, mabyć, ničomu nas nie navučyŭ. Hadoŭ 10 tamu my ličyli, što Ukraina plus Rasija — siabroŭstva naviek. I ništo nas nie razłučyć. Usio akazałasia značna horš. Siońnia my ŭpeŭnienyja, što Biełaruś — heta časovyja ciažkaści. I našy zachodnija miežy jak byli na biełaruskim zamku, tak i zastanucca. Ale ŭsio moža paviarnucca niečakanaściu. Jašče hod tamu Łukašenka kazaŭ pra toje, što nikoli i nichto nas z Rasiejaj nie pasvaryć, a siońnia razmova idzie pra ŭmacavańnie supracoŭnictva Biełarusi z NATA. Heta nahadvaje Ukrainu, dzie ŭsio kaliści pačałosia sa zbližeńnia z NATA, a skončyłasia razryvam adnosin z Rasijaj, jaki niekatoryja ekśpierty ličać časovym, śćviardžajučy, što hadoŭ praz 20—30 «my znoŭ budziem bratami». Na žal, heta nie tak».
Ura.ru: ZŠA nie dapamohuć ekanomicy Biełarusi
ZŠA nie dapamohuć ekanomicy Biełarusi, kali pačnuć pastaŭlać svaju naftu zamiest rasijskaj — heta rašeńnie biessensoŭnaje. Takoje mierkavańnie ŭ razmovie z Ura.ru vykazaŭ ekanamist, ekśpiert Instytuta ekanamičnaj palityki im. Hajdara Siarhiej Žavarankaŭ.
«ZŠA nie dapamohuć prezidentu Biełarusi Alaksandru Łukašenku, kali pačnuć pastaŭlać u krainu svaju naftu zamiest rasijskaj, tamu što Minsku patrebna nie lubaja nafta, a nafta takich hatunkaŭ, jakija padyduć dla zahruzki ŭ naftapierapracoŭčyja zavody. Jaje biez mytnaj pošliny pastaŭlaje Rasija. ZŠA ž prapanujuć naftu pa rynkavaj canie — ekanamična heta nie maje sensu dla Łukašenki», — raspavioŭ Ura.ru Žavarankaŭ.
