Mastak Alaksiej Kuźmič zładziŭ novuju akcyju — pryšpiliŭ značok BRSM da hrudziej FOTA
Mastak Alaksiej Kuźmič, toj samy, jaki pryjšoŭ na adkryćcio svajoj vystavy z tabličkaj Minkulta na intymnym miescy, zładziŭ čarhovuju art-akcyju. Na hety raz jon «prynios siabie ŭ achviaru» BRSM. Mastak abviazaŭ hałavu pijanierskim halštukam, pryšpiliŭ da hołych hrudziej značok BRSM i adpraviŭ pieršamu sakrataru arhanizacyi Dźmitryju Varaniuku zajavu na ŭstupleńnie.
«Uračysta śpiašajusia paviedamić, što ja ŭstupiŭ u šerahi vašaha abjadnańnia, dziejśniŭšy abrad paśviačeńnia. Źjaŭlajučysia ciapier jaho členam i razumiejučy sutnaść funkcyjanavańnia arhanizacyi, prapanoŭvaju pierajmienavać BRSM u «Radzima-BDSM», što, na moj pohlad, dakładniej adlustroŭvaje śpiecyfiku vašaj dziejnaści i jaje padabienstva z praktykami sadamazachizmu i psichaseksualnaha daminavańnia», — napisaŭ Kuźmič u zajavie.
Mastak patłumačyŭ, što heta akcyja — razvažańnie nad tym, jak ideałohija ŭpłyvaje na čałavieka.
«Heta pra sieparacyju, pošuk vorahaŭ, aŭtarytarny režym, u jakim dziaržava sprabuje kiravać usimi pracesami ŭ krainie. Paraŭnańnie ideałohii ź niezdarovym, akultnym vieravańniem, u jakim prynosiacca achviary, praktykujucca inšyja rečy, jakija byli ŭ Siaredniavieččy. I samaje cikavaje, što heta ŭsio praciahvaje žyć. Ideałohija hubić čałavieka, jaho svabodu.
A BRSM — heta jak krynica pramyvańnia mazhoŭ u sučasnaj Biełarusi. Arhanizacyja parazituje na teoryjach minułaha, jakija pakazali svaju niasłušnaść»,
— prakamientavaŭ jon «NN».
Alaksiej Kuźmič raskazaŭ, što ŭsio zrabiŭ ź pieršaj sproby.
«Ja ŭziaŭ pirsinh-ihłu, paprasiŭ pabolš, kab kroŭ pajšła. Prakołvaŭ skuru biez abiazbolvańnia — ja navat da stamatołaha kali chadžu, aniesteziju nie rablu».
Sam mastak u BRSM nikoli nie byŭ. A značok nabyŭ u internecie ŭ niejkaha pierakupa.
BRSM adkazvaje skandalnamu mastaku Kuźmiču: Hatovy pryniać u svaje šerahi i paraić psichaterapieŭta
