«Za hod jon ssoch u dva razy». Sudovy ekśpiert, były aśpirant Akademii navuk pamior ad anareksii ŭ 24 hady
Padčas chvaroby. Fota sudexpert.grodno.by.
Anareksija ŭ chłopca pačałasia paśla treciaha kursa ŭniviersiteta.
Byli prablemy sa zdaroŭjem, i daktary rekamiendavali chłopcu skinuć vahu. Ale niešta pajšło nie tak.
Dzianis sprava. Fota grsu.by.
«My jaho ledź paznali, za hod jon ssoch u dva razy», — uspaminaje adzin z adnakurśnikaŭ junaka.
Chłopiec usio ž zdoleŭ atrymać vyšejšuju adukacyju, pracavaŭ sudovym ekśpiertam i pastupiŭ u aśpiranturu. Ale arhanizm urešcie nie vytrymaŭ.
Dzianis A. byŭ z Hrodna. Ź dziacinstva cikaviŭsia litaraturaj, udzielničaŭ u alimpijadach pa rasiejskaj movie. Pastupiŭ u Hrodzienski dziaržaŭny ŭniviersitet imia Janki Kupały, na fiłałahičny fakultet. Tam ža skončyŭ mahistraturu.
Fota grsu.by.
Paśla ŭniviersiteta Dzianis pracavaŭ sudovym ekśpiertam va ŭpraŭleńni dziaržkamiteta sudovych ekśpiertyz pa Hrodzienskaj vobłaści. Jaho viedy ŭ linhvistycy spatrebilisia dla praviadzieńnia fanietyčnych ekśpiertyz — identyfikacyi čałavieka pa hołasie i maŭleńni.
U aśpiranturu Instytuta litaraturaznaŭstva imia Janki Kupały Akademii navuk Biełarusi chłopiec pastupiŭ na zavočnaje. U instytucie raskazvajuć, što jon pabyŭ u ich niadoŭha. Praz chvarobu zajmacca navukaj jamu było niaprosta. Tamu Dzianis i vyrašyŭ zabrać dakumienty.
Kažuć, niadaŭna chłopcu rabili apieracyju. Paśla jaje junak i nie zmoh adnavicca.
U sacyjalnych sietkach u Dzianisa ŭsiaho ź dziasiatak siabroŭ. Pa słovach blizkich, u afłajnie ŭ jaho było mnoha pryjacielaŭ, tolki apošnim časam pad upłyvam chvaroby chłopiec staŭ bolš zamkniony.
Na raźvitańnie ź im pryjšli i siabry, i kalehi, i nastaŭniki, i byłyja adnakłaśniki. Usie adhukajucca pra jaho jak pra dobraha čałavieka.
«Kamiak niervaŭ, jaki šukaje kampaniju siarod knih i jakasnaha kino», — pakinuŭ dopis u hrafie «pra siabie» ŭ sacyjalnych sietkach były aśpirant.
Dzianis byŭ adzinym dziciem u siamji, i dla baćkoŭ strata syna stała strašnym udaram.
