Kitajskija vajskoŭcy błakavali horad Uchań u suviazi z novym virusam
Zakrytyja vakzały, aeraport i vyjezdy z horada.
Kolkaść zachvarełych na novy typ karanavirusa ŭ roznych pravincyjach Kitaja składaje 571 čałaviek, 95 čałaviek znachodziacca ŭ ciažkim stanie. Raniej paviedamlałasia pra 17 pamierłych. Virus raspaŭsiudziŭsia ŭ 25 pravincyjach i haradach KNR.
U sieradu kitajskija ŭłady pryniali rašeńnie časova spynić pracu hramadskaha transpartu va Uchani, kab praduchilić dalejšaje raspaŭsiudžvańnie infiekcyi.
Aŭtobusy, mietro, paromy i transpart, jaki zajmajecca pieravozkami pasažyraŭ na dalokija adlehłaści, spynili pracu 23 studzienia ŭ 10 ranicy pa miascovym časie.
Dla žycharoŭ horada buduć začynienyja aeraport i čyhunačnyja stancyi.
Uchań — heta bujny i važny horad z transpartnymi i ekanamičnymi suviaziami pa ŭsim śviecie. Z Uchania lotajuć pramyja avijarejsy ŭ Łondan, Paryž, Dubaj i mnohija inšyja harady. U horadzie žyvie 11 młn čałaviek, bolš čym va ŭsioj Biełarusi.
Ułady Kitaja paraili hramadzianam paźbiahać miescaŭ zboru ludziej i nie jeździć va Uchań, a tym, chto ŭžo znachodzicca tam, nikudy nie vyjazdžać.
«Hałoŭnaje — nie jeździcie va Uchań. A tych, chto tam znachodzicca, ja zaklikaju nie pakidać horad», — skazaŭ namieśnik kiraŭnika dziaržaŭnaha kamiteta KNR pa spravach achovy zdaroŭja Li Biń.
Krynicaj novaha virusa, jak ličać ułady, staŭ rynak va Uchani, dzie pradavalisia morapradukty, ptuški, źmiei, trusy dy inšyja žyvioły. Zabarona na prodaž žyvoj ptuški i žyvioły ŭžo ŭviedziena, u najbujniejšych transpartnych vuzłach horada ŭzmocniena rabota sistem vientylacyi.
«Nam užo viadoma, što chvaroba pryjšła z rynku, na jakim išoŭ niezakonny handal dzikimi žyviołami. Mahčyma, nośbitam virusa była žyvioła, a zatym jon pierajšoŭ da čałavieka», — kaža dyrektar Centra pa kantroli i prafiłaktycy chvarob Hao Fu.
Za minułyja sutki ŭ śviecie zarehistravany 131 novy vypadak zaražeńnia i vosiem śmiarotnych vynikaŭ. Usie pamierłyja — u asnoŭnym ludzi, starejšyja za 65 hadoŭ.
U Hankonhu zafiksavany dva vypadki zaražeńnia, pa adnym vypadku ŭ Makaa, Tajvani, ZŠA, Japonii, Paŭdniovaj Karei, try — u Tajłandzie.
Pad miedycynskimi nahladam znachodziacca 4928 čałaviek, jakija mieli ciesny kantakt z chvorymi.
