Žychar Baranavič vyzvaliŭsia ź izalatara i ŭ toj ža viečar skraŭ u baćki $6000
Žychar horada vyzvaliŭsia ź izalatara ŭ Drahičynie, dzie adbyvaŭ pakarańnie za kradziež mabilnaha telefona, i pryjechaŭ da svaich baćkoŭ u Baranavičy, paviedamlaje MUS.
15 studzienia jon daviedaŭsia, što ŭ baćkoŭskaj kurtcy lažyć 6 tysiač dalaraŭ, pryznačanyja dla zamiežnaj kamandziroŭki. Kali baćka zasnuŭ, a maci vyjšła z kvatery, syn zabraŭ hrošy i pajšoŭ z domu. Za baćkavy hrošy jon źniaŭ dźvie kvatery, kupiŭ załaty piarścionak i hadzińnik. Mužčyna staŭ marnavać hrošy na naviedvańnie kłubaŭ i baraŭ.
Baćka niekalki dzion nie źviartaŭsia ŭ milicyju, viedajučy ab kradziažy. Jon spadziavaŭsia ŭbačyć syna i paprasić jaho viarnuć skradzienaje.
Paśla pastupleńnia zajavy apieratyŭnaja hrupa 19 studzienia zatrymała padazravanaha la padjezda doma, u jakim jon zdymaŭ kvateru. Ad vykradzienaj sumy na momant zatrymańnia ŭ chłopca zastałosia 800 dalaraŭ, 110 rubloŭ, piarścionak i hadzińnik.
Ciapier mužčyna znachodzicca ŭ izalatary časovaha ŭtrymańnia. Raniej syna nieadnarazova pryciahvali da kryminalnaj adkaznaści za kradziažy, rabavańni i niezakonnaje abaračeńnie narkotykaŭ.
