U Breście ad mieninhitu pamior 18-hadovy pamiežnik. Mahčyma, paśla ŭkusu klašča
Fota sa staronki Paŭła Sihniejeva Ukantakcie.
Jak stała viadoma «Našaj Nivie», chłopiec zachvareŭ na mieninhit.
Chłopiec pryjechaŭ u Brest dla prachodžańnia navučańnia pa śpiecyjalnaści «inśpiektar pamiežnaj słužby». Praz 60 dzion jaho nie stała, piša Bresckaja hazieta.
Pra toje, što ŭ Breście pamior małady pamiežnik, «BH» raspavioŭ aficyjny pradstaŭnik Bresckaj pamiežnaj hrupy Siarhiej Dźmitryjeŭ. Chłopca zvali Pavieł Sihniejeŭ. U červieni minułaha hoda jamu spoŭniłasia 18 hadoŭ. Jaho pryzvali ŭ Brest dla prachodžańnia navučańnia pa śpiecyjalnaści «inśpiektar pamiežnaj słužby» ź vioski Starahrad Karmianskaha rajona. Prybyŭ Pavieł 21 listapada 2019 hoda.
«Usio zdaryłasia raptoŭna. 7 studzienia Pavieł byŭ nakiravany ŭ balnicu chutkaj dapamohi, a adtul dla dalejšaha lačeńnia — u Bresckuju abłasnuju balnicu. Na žal, chvaroba akazałasia macniejšaj i ŭčora (20 studzienia) — zdaryłasia trahiedyja, jon pamior», — raspavioŭ Dźmitryjeŭ.
Pavodle jaho słoŭ, baćkam vajskoŭca adrazu paviedamili pra zdareńnie. U Brest pryjechała jaho maci.
«Pražyvała ŭ nas tut ža, nazirała, ale adbyłosia toje, što adbyłosia», — skazali ŭ pres-słužbie pahranhrupy.
Pa infarmacyi, jakaja cyrkuluje siarod sasłužyŭcaŭ, pryčynaj mieninhitu moh stać klešč, jaki nibyta ŭkusiŭ chłopca vosieńniu, jašče da słužby, ale hetamu faktu siamja ŭvahi nie nadała.
«Pryjšli my ŭ 20-ch čysłach listapada, a ŭ śniežni jon pačaŭ narakać na hałaŭnyja boli. U miedpunkcie jamu niešta vypisvali ad hałavy, ale nie dapamahło. Paśla zavieźli na abśledavańnie ŭ balnicu — mieninhit!», — skazali vajskoŭcy «Našaj Nivie».
