Znakamitaja halivudskaja kinastudyja mianiaje nazvu, kab nie asacyjavacca z Trampam
Kampanija Disney vyrašyła pierajmienavać svaju kinastudyju 20th Century Fox — ź jaje nazvy źniknie słova «fox» (anhł. — lisica), i jana budzie nazyvacca 20th Century Studios, piša bbc.com.
Ułaśniki adnoj z najstarejšych halivudskich kinakampanij sprabujuć pazbavicca ad asacyjacyj z Rupiertam Merdakam i jaho telekanałam Fox News, jaki ŭ ZŠA ličycca ruparam respublikancaŭ. U Halivudzie tradycyjna daminujuć libieralnyja kaštoŭnaści, i simpatyi bolšaści supracoŭnikaŭ industryi — na baku demakrataŭ.
Kampanija Disney aficyjna nie tłumačyć pryčyny svajho rašeńnia, ale słova Fox taksama prybiaruć z nazvy jašče adnoj jaje kinastudyi — Fox Searchlight Pictures. Apošniaja śpiecyjalizujecca na vytvorčaści art-chaŭsnych filmaŭ.
Časopis Variety, jaki pieršym paviedamiŭ ab pierajmienavańni, cytuje krynicu ŭ kampanii Disney: «Dumaju, nazva Fox prama źviazana z Merdakam, a heta taksična».
Zrešty, Variety śćviardžaje, što znakamitaja zastaŭka dla filmaŭ telekampanii 20th Century Fox — z charakternaj muzykaj, łahatypam i pražektarami — zastaniecca bieź źmienaŭ.
Kampanija Disney kupiła 20th Century Fox u sakaviku minułaha hoda za 71 młrd dalaraŭ.
Studyja była stvorana ŭ 1935 hodzie, i na joj byli źniatyja niekatoryja z samych kasavych filmaŭ u historyi, u tym liku «Avatar», «Tytanik» i niekalki epizodaŭ «Zornych vojnaŭ».
U kancy 1980-ch News Corporation, jakaja naležyć Merdaku, nabyła 20th Century Fox, a ŭ 1996 hodzie byŭ stvorany telekanał Fox News. Z časam jon vyjšaŭ na pieršaje miesca ŭ ZŠA pa kolkaści hledačoŭ.
