Kraŭdfandynham źbirajuć hrošy na pastanoŭku inkluziŭnaha śpiektakla na scenie Kupałaŭskaha. Siarod łotaŭ — čajavańnie sa Śviatłanaj Aleksijevič
15 studzienia na kraŭdfandynhavaj płatformie Ulej.by byŭ apublikavany niezvyčajny prajekt. U im syšlisia nobieleŭskaja łaŭreatka Śviatłana Aleksijevič, čempijon śvietu pa muaj-taj Vital Hurkoŭ, rok-hurt NIZKIZ, a taksama dva teatry: siamiejny inkluziŭ-teatr «i» dy Nacyjanalny akademičny teatr imia Janki Kupały.
Meta niečakanaj kałabaracyi — pradstavić pieršy ŭ historyi inkluziŭny śpiektakl na hałoŭnaj scenie Kupałaŭskaha i padaryć junym akcioram, u tym liku dzieciam z aŭtyzmam, adnu z najvažniejšych teatralnych scen Biełarusi.
— Dla luboha dziciaci vystupać na scenie — vialikaja padzieja i nahoda dla honaru, — kaža mastacki kiraŭnik siamiejnaha inkluziŭ-teatra «i» Iryna Puškarova. — Vystup ža na takoj značnaj u maštabach krainy placoŭcy, jak hałoŭnaja scena Teatra imia Janki Kupały, pakul usprymajecca našymi vychavancami jak śmiełaja mara ci amal niedasiažnaja kazka. Vielmi chočacca, kab hetaja kazka stała dla ich realnaściu.
«Adnojčy ŭ vializnym horadzie» — biełaruskamoŭnaja pastanoŭka, zasnavanaja na siužecie apaviadańnia F.M. Dastajeŭskaha. Admysłovyja 3D-dekaracyi dapamahajuć emacyjna adčuć historyju chłopčyka, jaki straciŭ svaju siamju i zastaŭsia zusim adzin na chałodnych vulicach vialikaha horada biez šansaŭ na vyratavańnie…
Udzielniki kraŭdfandynhu mohuć abrać łot na svoj hust: prosta padrymać inicyjatyvu, nabyć kvitok na śpiektakl abo abrać bolš ekskluziŭnuju opcyju. Siarod apošnich — admysłovaja treniroŭka pa muaj-taj ad Vitala Hurkova, zaprašeńnie na prezientacyju novaha alboma hurta NIZKIZ, mahčymaść naviedvać usie premjery Kupałaŭskaha ciaham 2020-ha hoda, a taksama zaprašalnik u VIP-łožu sa Śviatłanaj Aleksijevič i čajavańnie ź piśmieńnicaj u teatralnym bufiecie.
— Lubyja inkluziŭnyja inicyjatyvy nievierahodna važnyja dla sučasnaha hramadstva, — kamientuje łaŭreatka Nobieleŭskaj premii pa litaratury Śviatłana Aleksijevič. — U pryvatnaści, udzieł u teatralnych pastanoŭkach raźniavolvaje i vučyć kamunikavać lubych dziaciej, u tym liku dziaciej z aŭtyzmam. Ja z zadavalnieńniem paŭdzielničaju u hetym dobrym prajekcie, i jak kraŭdfandar, i jak zaprošanaja hościa. Ź nie mienšaj radaściu sustrenusia ź nieabyjakavymi amatarami mastactva, pahutaru ź imi za kubkam harbaty.
Heta nie ŭsie łoty ad biełaruskich zorak, ale astatnija arhanizatary pakul trymajuć u sakrecie — jany buduć źjaŭlacca na praciahu ŭsioj kraŭdfandynhavaj kampanii.
