«Biełnaftachim» adpraŭlaje delehacyju ŭ Kazachstan nakont pastavak nafty. Nur-Sułtan budzie dumać
Zapyt ad Biełarusi na pastaŭku nafty ad Kazachstana pastupiŭ, u studzieni ŭ respubliku pryjeduć pradstaŭniki «Biełnaftachima», uhoda mahčymaja pry ekanamičnaj vyhadzie dla kazachstanskich kampanij, skazaŭ u sieradu žurnalistam kiraŭnik Minenierha Kazachstana Nurłan Nahajeŭ, piša ria.ru
«Zajava, prośba ad «Biełnaftachima» pastupiła ŭ naš adras, u adras ministerstva. Pradstaŭniki viedamstva płanujuć pryjechać u Kazachstan dla abmierkavańnia pastaŭki. My na siońniašni dzień ažyćciaŭlajem pastaŭki nafty pa dyviersifikavanych napramkach, i my razhledzim prapanovu biełaruskaha boku», - skazaŭ Nahajeŭ žurnalistam.
Jon paviedamiŭ, što viedamstva arhanizuje sustreču z zacikaŭlenymi kampanijami Kazachstana. «Kali chto-niebudź z naftavych kampanij vyjavić žadańnie pry ekanamična vyhadnaj canie abo pry ŭmovach, jakija ich zadavalniajuć, ja dumaju, što ŭhoda mahčymaja», - skazaŭ Nahajeŭ, dadaŭšy, što pieramovy płanujecca pravieści da 20 studzienia.
Nahadajem, što ŭčora pieršy vice-premjer Dźmitryj Kruty pa vynikach narady ŭ Łukašenki zajaviŭ, što Biełaruś nakiravała kamiercyjnyja prapanovy ab kupli nafty va Ukrainu, Polšču, Kazachstan, Azierbajdžan i krainy Bałtyi.
Azierbajdžan zajaviŭ, što pieramovy vialisia, Baku hatovy, ale ničoha kankretnaha pakul što niama. U Polščy adznačyli, što niemahčyma pastaŭlać naftu pa «Družbie» ŭ aviersnym i reviersnym režymie adnačasova. Taksama pytańnie tranzitu nafty budzie abmierkavana padčas vizitu ŭ Biełaruś premjera Łatvii Kryšjanisa Karyńša.
