Eks-pamočnik Paŭličenki: U asacyjacyi źbirali hrošy na apieracyju Haraŭskamu, ale jany źnikli
Pry kancy minułaha hoda niamieckaje vydańnie «Dojče Viele» apublikavała hutarku z byłym bajcom śpiecyjalnaha atrada chutkaha reahavańnia Juryjem Haraŭskim, u jakoj toj pryznaŭsia, što ŭdzielničaŭ u zabojstvie Juryja Zacharanki, Viktara Hančara i Anatola Krasoŭskaha.
Čytajcie: Były śpiecnazaviec: Ja ŭdzielničaŭ u zabojstvie Zacharanki i Hančara
Reakcyja byłoha kamandzira SACHRa Dźmitryja Paŭličenki, jaki nazyvaŭsia datyčnym da zabojstvaŭ, była vielmi niervovaja: jon to «pamiataŭ», to «nie pamiataŭ» svajho byłoha bajca.
Dźmitryj Paŭličenka
U ščyraść Haraŭskaha pavieryli nie ŭsie.
«Jon moh nazvać lubyja proźviščy svaich sasłužyŭcaŭ, jakich viedaŭ. Ja zajmaŭsia hetaj spravaj, ale proźvišča Haraŭskaha nie ŭspaminaju. Dla čaho jamu heta? Hrošy ci lehalizacyja ŭ ES», — kazaŭ śledčy prakuratury Dźmitryj Pietruškievič, jaki ŭ 2000-ja pieršym zajaviŭ pra «eskadrony śmierci» i ciapier žyvie ŭ emihracyi ŭ ZŠA.
Ciapier «Našaj Nivie» stali viadomyja niekatoryja novyja abstaviny hetaj historyi, jakija mohuć patłumačyć mahčymyja pryčyny kryŭdy Haraŭskaha.
My znajšli biznesmienaŭ, jakija śćviardžajuć, što hod tamu pieravodzili vialikuju sumu na rachunak Asacyjacyi vieteranaŭ śpiecnaza «Honar». Jany davali hrošy ŭ tym liku dla apłaty apieracyi pa zamienie sustava adnamu z byłych bajcoŭ.
Ale hetyja hrošy źnikli.
Havorka idzie pra sumu 8450 rubloŭ.
«Ja viedaju, što hrošy mielisia pajści na padtrymku vieteranaŭ asacyjacyi, u tym liku miedycynskuju. Havorka viałasia pra zamienu sustava, jak ciapier možna padumać — Haraŭskamu, ale proźviščaŭ ja tady nie zapaminaŭ. Los hrošaj mnie nieviadomy», — ananimna skazaŭ «Našaj Nivie» pradstaŭnik kampanii.
Supracoŭnictva musiła być uzajemavyhadnym. Asacyjacyja abiacała dapamahčy hetamu biznesmienu ŭvajści ŭ niejki prajekt, ale ŭ vyniku ničoha nie atrymałasia.
Tyja 8450 rubloŭ byli pieraličanyja na padstavie lista ab sponsarskaj dapamozie za podpisam Paŭličenki.
Ci mahło być tak, što Haraŭski ŭžo žyŭ nadziejaj pazbavicca ad bolaŭ, ale hrošy da jaho tak i nie dajšli?
Tak ci inačaj, apieracyju jon zrabiŭ za miažoj: «Jamu paabiacali apieracyju ŭ Hiermanii», — kazała «Našaj Nivie» maci Haraŭskaha, nie ŭdakładniajučy, chto zrabiŭ takuju ščodruju prapanovu.
Jak kamientuje situacyju sam Paŭličenka?
Jon skazaŭ «Našaj Nivie», što nijakich zboraŭ na dapamohu Haraŭskamu nie pravodziłasia. Ale, maŭlaŭ, jon sam niejki čas sapraŭdy davaŭ hrošy siamji Haraŭskaha, pakul žonka byłoha śpiecnazaŭca nibyta nie paviedamiła pra narkatyčnuju zaležnaść muža. Z taho času — ni kapiejki.
My taksama źviarnulisia pa kamientar da pamočnika Paŭličenki ŭ asacyjacyi «Honar» Ihara Parečyna. Heta jon krytykavaŭ reakcyju načalnika na skandał u ŚMI i prasiŭ Łukašenku dazvolić pravieści pres-kanfierencyju.
Čytajcie: Pamočnik Paŭličenki źviarnuŭsia da Łukašenki: «Haraŭski — ałkaholik, dazvolcie dać pres-kanfierencyju»
Fota Parečyna.
Parečyn paznaje numar rachunka, na jaki pieraličvalisia hrošy. U asacyjacyi «Honar» mienavita jon zajmaŭsia pryciahvańniem sponsarskaj dapamohi.
«Sutnaść majoj raboty była ŭ tym, kab znachodzić biznesoŭcaŭ, jakija hatovyja akazać dapamohu vieteranam asacyjacyi. Pa słovach Paŭličenki, ahułam u nas było 23 tysiačy čałaviek, siarod ich jość invalidy. Hetyja 8 tysiač rubloŭ — pra ich damaŭlaŭsia asabista ja. My z Paŭličenkam abmiarkoŭvali, kudy pojduć hrošy. Było damoŭlena — na dapamohu chłopcam, u tym liku apieracyi. Proźvišča Haraŭskaha hučała. Ja ž jaho asabista viedaju, my žyviom u adnym dvary, jon žanaty z dačkoj majho siabra, — skazaŭ Parečyn.
Ale Parečyn taksama nie viedaje, kudy padzielisia hrošy.
«Ja asabista pisaŭ list Paŭličenku, aficyjna. Mnie treba było viedać, pa jakim pryncypie raźmiarkoŭvajucca srodki, ci jość niejkija listy čakańnia dapamohi, śpisy, kamu patrebny hrošy? Hetyja ludzi pišuć zajaŭki ci jašče jak? Heta infarmacyja, patrebnaja sponsaram. Ale jon admoviŭsia brać hetyja listy pad rośpis, adkazu nie daŭ. Ja dasłaŭ ich na aficyjny adras asacyjacyi, ale jany viartalisia, z čaho možna rabić vysnovu, što ŭ ofisie nikoha nie byvaje», — dadaje jon.
Paśla pryznańnia Haraŭskaha Parečyn raskrytykavaŭ reakcyju Paŭličenki na skandał i nieŭzabavie paśla taho jaho vyklučyli z asacyjacyi.
Sam Parečyn źviazvaje havarlivaść Haraŭskaha z raniejšym znajomstvam z byłym načalnikam SIZA №1 Aleham Ałkajevym, jaki ciapier žyvie ŭ emihracyi ŭ Hiermanii.
Były śpiecnazaviec siadzieŭ u minskim SIZA za vymahalnictvy, kali ŭstanovaj kiravaŭ byŭ Ałkajeŭ.
I jak śćviardžaje Parečyn, Ałkajeŭ vykarystoŭvaŭ Haraŭskaha dla «pracy» ŭ «pres-chatach». Pa jaho słovach, u takich kamierach zvyčajna pracuje «pres» (toj, chto ciśnie na niezhavorlivych aryštantaŭ albo pahražaje im) i «kački» (słuchajuć usio, što kaža źniavoleny, i pieradajuć administracyi). Jon vykazvaje zdahadku, što praz Ałkajeva Haraŭski moh trapić za miažu.
Sa słovaŭ Parečyna, dziŭnaja situacyja ŭ asacyjacyi daviedziena da viedama ministra ŭnutranych spraŭ Juryja Karajeva.
