Viciebskaha aktyvista Chamajdu aštrafavali na 810 rubloŭ za pikiet u dzień pierapachavańnia Kalinoŭskaha
U Čyhunačnym sudzie Viciebsku 9 studzienia sudździa Jury Urban paličyŭ dakazanym fakt administracyjnaha pravaparušeńnia, u jakim abvinavačvali Barysa Chamajdu. Vyjšaŭšy na adzinočny pikiet, hramadzki aktyvist parušyŭ paradak arhanizacyi i praviadzieńnia masavych mierapryjemstvaŭ (č.1 art. 23.34 KaAP). Štraf — 30 bazavych vieličyniaŭ (810 rubloŭ), paviedamlaje Viciebskaja Viasna.
Pavodle ahučanaha sudździom pratakołu, 22 listapada 2019 hodu Barys Chamajda, nia majučy dazvołu miascovaha vykanaŭčaha orhana, vyjšaŭ na adzinočny pikiet la «siniaha domu». U rukach trymaŭ bieł-čyrvona-bieły ściah, na hrudzioch — plakat. Vinavataść Chamajdy dakazvałasia vyklučna na padstavie materyjałaŭ, uziatych ź internetu. U toj dzień nichto z pravaachoŭnikaŭ da jaho nie padychodziŭ, nie rabiŭ zaŭvah i nie zatrymlivaŭ.
Chamajda paćvierdziŭ svajo znachodžańnie ŭ centry horadu 22 listapada, ale nie pahadziŭsia z tym, što parušyŭ tym samym zakon. Patłumačyŭ, što plakat i ściah byli nieabchodnyja dla taho, kab danieści da ludziej metu svajho ŭčynku.
«Heta byŭ dzień pachavańnia nacyjanalnaha hieroja Kastusia Kalinoŭskaha i jaho paplečnikaŭ, u jaki ja prosta nia moh nia vyjści. Heta byŭ poklič dušy. Pajechać u Vilniu ja nia mieŭ ani hrošaj, ani času, tamu i staŭ tut», — patłumačyŭ Chamajda.
