Śledčy kamitet nie budzie adnaŭlać spravu źnikłaha žurnalista Zavadskaha
Śledčy kamitet Biełarusi adkazaŭ žoncy vykradzienaha dvaccać hod tamu apieratara ORT Dźmitryja Zavadskaha, pieradaje Deutsche Welle. Śledčyja nie bačać padstavaŭ dla dopytu novych śviedak. Śviatłana Zavadzkaja nazvała adkaz cyničnaj adpiskaj.
Śviatłana Zavadskaja, žonka vykradzienaha ŭ 2000 hodzie apieratara ORT Źmitra Zavadzkaha, atrymała 6 studzienia, adkaz sa Śledčaha kamiteta Biełarusi na svaju zajavu z prośbaj dapytać u jakaści śviedak asob, proźviščy jakich nazvaŭ u intervju DW eks-bajec biełaruskaha SACHRa Juryj Haraŭski. Adnak SK u liście, adrasavanym Zavadskaj, paviedamiŭ, što padstavaŭ adnaŭleńnia prypynienaha papiaredniaha rasśledavańnia niama.
«Asoby, jakija ažyćciavili vykradańnie Vašaha muža, ustanoŭlenyja i asudžanyja za złačynstva prysudam Minskaha abłasnoha suda ad 13.02 2002 — napisana ŭ rašeńni SK. — Mierkavańnie Haraŭskaha ab vykradańni D.Zavadskaha inšymi asobami, vykazanaje im u intervju radyjostancyi «Niamieckaja chvala», nie źjaŭlajecca padstavaj dla adnaŭleńnia prypynienaha papiaredniaha rasśledavańnia».
Śviatłana Zavadskaja nazvała taki adkaz Śledčaha kamiteta najbolš cyničnym za ŭsie hady pierapiski z SK i prakuraturaj. Jana patłumačyła, što asudžanym za złačynstva suprać jaje muža pastavili ŭ vinu tolki jahonaje vykradańnie, adnak dalejšy los jaje muža tak i nie vyśvietleny.
