Rasija zapatrabavała ŭ ramkach abmienu z Ukrainaj fašysta, eks-člena UNA-UNSO. Vyjaviłasia, jon byŭ ich ahientam
Padčas apošniaha rasijska-ŭkrainskaha abmienu pałonnymi žurnalisty źviarnuli ŭvahu na niekatorych asob, jakich Ukraina pieradała Rasii. Rasija akramia sieparatystaŭ i bierkutaŭcaŭ, jakich padazravali ŭ rasstrełach na Majdanie, uklučyła ŭ śpis… adnaho z byłych lidaraŭ ukrainskaj nacyjanalistyčnaj arhanizacyi UNA-UNSO Eduarda Kavalenku.
U heta ciažka pavieryć, ale heta nie pamyłka. Pra pieradaču Kavalenki «ŁNR» paviedamlali navat aficyjnyja rasijskija ŚMI. Jak ža tak atrymałasia, što Rasija ŭklučyła ŭ śpisy na abmien ukrainskaha nacyjanalista, jaki siadzieŭ va ŭkrainskaj turmie?
Kavalenka nie prosta pravy nacyjanalist-patryjot, jakich rasijskija prapahandysty časta nazyvajuć «fašystami». Kavalenka — samy sapraŭdny fašyst, jaki zihavaŭ, maršyravaŭ ź simvolikaj SS, raspalvaŭ nianaviść suprać jaŭrejaŭ i kaŭkazcaŭ i h.d.. Kožny dzień rasijskija prapahandysty kryčać pra «fašystaŭ» va Ukrainie, ale kali havorka idzie pra fašystaŭ realnych, jany ich abaraniajuć i navat uklučajuć u śpisy na abmien. Čamu ž?
A ŭsio vielmi prosta. Akazałasia, Eduard Kavalenka byŭ pravakataram, jakoha rasijanie vykarystoŭvali dla dyskredytacyi ŭkrainskich patryjatyčnych sił. Naprykład, u 2004 hodzie prarasijskija palityčnyja siły vykarystoŭvali jaho vobraz fašysta, kab apuścić rejtynh Viktara Juščanki.
Kali pačałasia vajna, Kavalenka atrymaŭ inšyja zadačy. U 2017 hodzie Kavalenku asudzili za supraćdziejańnie vajskovaj mabilizacyi. Jon trapiŭ va ŭkrainskuju turmu, a ciapier rasijanie za jaho zastupilisia, uklučyli ŭ śpisy na abmien i vyzvalili.
Situacyja vydatna adlustroŭvaje, nakolki ŭkrainski nacyjanalistyčny ruch (i, łahična dapuścić radykalnyja hrupoŭki ŭ inšych postsavieckich krainach), našpihavany rasijskimi ahientami i pravakatarami.
Admietna, što rasijskija ŚMI zaraz saramliva nazyvajuć Kavalenku «lidaram adnoj z palityčnych partyj Ukrainy», i ničoha nie pišuć pra jaho palityčny bekhraŭnd.