Śviatłana Kalinkina: Moža, heta i vykanaŭcy zabojstva Šaramieta, ale chto zamoŭcy?
Žurnalistka, hałoŭnaja redaktarka «Biełaruskaha partyzana» Śviatłana Kalinkina doŭhi čas intensiŭna pracavała razam z Paŭłam Šaramietam. Za ich sumiesnym aŭtarstva vyjšła kniha «Vypadkovy prezident». Śviatłana Kalinkina padzialiłasia z «NN» uražańniami ad pieršych vynikaŭ śledstva pa spravie zabojstva Šaramieta.
«Ja b nie staviła tak pytańnie: jość davier ci niama davieru, praŭdziva ci nie praŭdziva. Ja b staviła pytańnie inačaj: niahladziačy na praviedzieny bryfinh, niahledziačy na zatrymanych, nielha kazać, što zabojstva Paŭła Šaramieta rasśledavana.
Pakul niama adkazaŭ na hałoŭnyja pytańni: čamu mienavita Šaramieta zabili, chto byŭ zacikaŭleny ŭ destabilizacyi situacyi va Ukrainie, čamu jaje nie adbyłosia paśla śmierci Paŭła, chto zamoŭca hetaha złačynstva? Vidavočna, što zatrymanyja ludzi mahli być vykanaŭcami zabojstva, ale adkul išła zamova?
Kali kiravacca tym zajavami śledstva, to atrymlivajecca, što jaho zabili ludzi, jakija jaho nie viedali, nijak nie pierasiakalisia, u ich nie było pretenzij da Šaramieta. Prosta sabrałasia hrupa ludziej i vyrašyła jaho zabić? Pryčym vielmi detalova padrychtavała ŭsio. Ja, ščyra kažučy, nie mahu ŭ heta pavieryć, mnie heta zdajecca nievierahodnym.
Pavinien być u spravie niejki inšy płan, navat kali hetyja ludzi — sapraŭdy vykanaŭcy zabojstva. Pra raskryćcio spravy pakul jašče rana kazać. Možna tolki skazać, što jość sproby pakazać, što śledstva idzie, na jaho nie zabylisia — heta tak.
Farmuloŭka «destabilizacyja situacyi ŭ krainie» jak abłoki, pad jaje padychodzić usio. Ale čamu mienavita Šaramiet? Va Ukrainie što, niama bolš viadomych rasijan ci biełarusaŭ? Što heta za dziŭnyja farmuloŭki ŭ spravie, što budučy «pradstaŭnikami aryjskaj rasy» jany vystupali za čyściniu rasy?
Vidavočna, što Zialenski ŭziaŭsia za spravu zabojstva Šaramiet bolš intensiŭna. Chacia taki sprečny momant: jahonaja prysutnaść na ŭčorašnim bryfinhu — heta plus ci minus.
Kali zatrymanyja padaduć u niejkija jeŭrapiejskija sudy, to Ukrajina im jašče i hrošy moža zapłacić za taki palityčny ŭdzieł u śledstvie.
Toje, što Zialenski ŭziaŭsia za rasśledavańnie, u adroźnieńni ad Parašenki, jaki tolki abiacaŭ, ale sprava nie rušyłasia z kropki, dobry fakt. Inšaja sprava, kab hetym nie skarystalisia siłaviki i nie padsunuli takuju sabie «chatniuju narychtoŭku».
