Kiraŭnik KDK: Działki zarablajuć $1,5 miljarda na nieabhruntavanaj canie, raźbirajemsia
U kułuarach pieršaha pasiedžańnia Pałaty pradstaŭnikoŭ siomaha sklikańnia karespandent «Našaj Nivy» pahavaryŭ z kiraŭnikom Dziaržkantrola Leanidam Anfimavym.
My pieradali jamu aściarohi biźniesa datyčna namieru KDK uziacca za pasiarednikaŭ — ci nie budzie heta realizavana ŭ škodu ekanomicy?
«Ja razumieju, što pasiarednik — heta nie zaŭsiody kiepska. Jak hramadzianinu mnie davodziłasia sutykacca z tym, što ŭ zavoda-vytvorcy adna cana, a ŭ internecie ŭ pasiarednika jana nižej na 30%, bo zavod prosta daŭ jamu dyskont. My havorym nie pra heta!
A pra nieabhruntavanaje pasiarednictva, kali tavar prachodzić praz łancužok działkoŭ, jakija navarvajucca na kožnym etapie. I ŭ krainu tavar prychodzić u 10 razoŭ daražejšym, čym jon na zavodzie. Kala paŭtara miljarda dalaraŭ asiadaje ŭ kišeniach działkoŭ na nieabhrutavanym zavyšeńni cany — heta suma jakuju ja mahu pryvieści, ale jakaja jana nasamreč? Ciažka skazać», — skazaŭ Anfimaŭ.
My taksama źviarnuli ŭvahu na toje, što ŭ «Našu Nivu» časam prychodziać skarhi ad biznesmienaŭ, jakija narakajuć na toje, što nie mohuć pradać svoj tavar na tendary, bo ŭmovy pišucca pad adnaho pastaŭščyka.
«Niespraviadliva pisać tendar tak, kab adpaviadaŭ tolki adzin vytvorca. Heta niejki zamoŭny konkurs, i takomu budzie davacca samaja žorstkaja acenka z boku pravaachoŭnych orhanaŭ i orhanaŭ kantrolu. Voś ciapier u nas na razhladzie adna skarha pa zakupkach enerhietyčnaha abstalavańnia, ź jakoj my raźbirajemsia — tam niaŭzbrojenym vokam vidać», — dadaŭ kiraŭnik KDK.
