Pucin padpisaŭ zakon ab «zamiežnych ahientach»
Prezident Rasii Uładzimir Pucin padpisaŭ zakon ab pašyreńni śpisu ŚMI, jakija mohuć być pryznanyja zamiežnymi ahientami, piša tass.ru.
Ciapier ŚMI, abvieščanaje ŭ Rasii «zamiežnym ahientam», abaviazana vykonvać usie abmiežavańni i abaviazki, uviedzienyja dla NKA — zamiežnych ahientaŭ, a taksama im pahražaje anałahičnaja adkaznaść za parušeńnie zakanadaŭstva.
Novy zakon praduhledžvaje, što zamiežnymi ŚMI, jakija vykonvajuć funkcyi zamiežnaha ahienta, mohuć być pryznanyja taksama pryvatnyja asoby, kali jany pašyrajuć paviedamleńni abo materyjały (u tym liku ŭ internecie), pryznačanyja dla nieabmiežavanaha koła asob, i atrymlivajuć finansavańnie z-za miažy. Pryčym havorka moža iści jak ab hrašovych srodkach, tak i ab inšaj majomaści, atrymanych ad zamiežnych dziaržaŭ, ich dziaržaŭnych orhanaŭ, mižnarodnych i zamiežnych arhanizacyj, zamiežnych hramadzian albo ad rasijskich jurydyčnych asob, jakija atrymlivajuć hrašovyja srodki ad nazvanych krynic.
Ministerstva justycyi RF nadzialajecca paŭnamoctvami pa viadzieńni rejestru zamiežnych ŚMI, jakija vykonvajuć funkcyi zamiežnaha ahienta.
Dla pracy ŭ RF «zamiežny ahient» abaviazany zasnavać rasijskuju jurydyčnuju asobu na praciahu adnaho miesiaca z dnia atrymańnia nazvanaha statusu, a taksama paviedamić profilnaje viedamstva. U vychodnych źviestkach ŚMI pavinna ŭtrymlivacca ŭkazańnie na toje, što jano stvorana zamiežnym ŚMI-zamiežnym ahientam. Taksama ŭvodzicca zabarona na raspaŭsiud pradukcyi ŚMI-zamiežnych ahientaŭ biez markiroŭki, u tym liku ŭ internecie.
Za parušeńnie vyznačanaha paradku dziejnaści praduhledžvajecca mahčymaść abmiežavańnia dostupu da infarmacyjnaha resursu ŚMI-zamiežnaha ahienta.
Zakon ustupić u siłu z dnia jaho aficyjnaha apublikavańnia.
