Nie pryniesła «daninu» — zvolniŭ: eks-kiraŭnika Brasłaŭskaha rajona i jaho žonku sudziać za karupcyju
U Viciebskim abłasnym sudzie 2 śniežnia pačaŭsia rezanansny praces u dačynieńni da muža i žonki, eks-čynoŭnikaŭ Brasłaŭskaha rajvykankama, piša tut.by.
Fota: Aleś Pilecki, tut.by
Pa spravie prachodziać 42-hadovyja Uładzimir Dranieŭski, były kiraŭnik rajona, i jaho žonka Alena — da aryštu jana kiravała ŭ miascovaj administracyi adździełam ekanomiki. Muža i žonku abvinavačvajuć u šerahu karupcyjnych złačynstvaŭ.
Chabarami Uładzimir Dranieŭski atrymaŭ amal 28 tysiač jeŭra, paviedamlała raniej MUS.
Pa viersii śledstva, kiraŭnik miascovaj viertykali dziejničaŭ z dapamohaj svajoj žonki — eks-načalnika adździeła ekanomiki rajvykankama.
Im vystaŭlenyja abvinavačańni pa artykułach za chabarnictva, machlarstva, pieravyšeńnie ŭłady i «admyvańnie» hrošaj.
Muža i žonku zatrymali letam 2018 hoda. Pad vartaj jany ad 27 červienia. Adno z apošnich źjaŭleńniaŭ Uładzimira Dranieŭskaha ŭ navinach krainy źviazana z adkryćciom parusnaj škoły ŭ Brasłavie za amal 100 tysiač jeŭra.
Dranieŭski zajaviŭ, što padčas śledstva na jaho «cisnuli»
Muž i žonka Dranieŭskija — ravieśniki, im pa 42 hady. U ich dvoje synoŭ — 18 i 20 hadoŭ, abodva — studenty BNTU.
Uładzimir Dranieŭski naradziŭsia ŭ Čašnikach. Jaho žonka — ź Viciebska.
U 2010—2015 hadach Dranieŭski kiravaŭ ŽKH u Čašnikach. U hetym ža horadzie ŭ rajvykankamie pracavała jaho žonka. Brasłaŭski rajon jon uznačaliŭ u studzieni 2015 hoda. Žonka zaniała ŭ administracyi pasadu načalnika adździeła ekanomiki.
U zału suda muža i žonku dastavili pad kanvojem. Muž vonkava nie prajaŭlaje nijakich emocyj, Alena ž časta płača. Pamiž saboj muž i žonka pierad pačatkam pracesu nie razmaŭlali.
Na pačatku pracesu Uładzimir Dranieŭski zajaviŭ:
- Padčas śledstva mnie paviedamlali ab drennym fizičnym i maralnym stanie žonki. I ŭ abmien na maje pryznalnyja pakazańni abiacali źmianić joj mieru strymańnia. Usie śledčyja dziejańni ŭ dačynieńni da mianie pastajanna pravodzilisia pad psichałahičnym ciskam. Prašu dałučyć hetuju zajavu da materyjałaŭ spravy.
Sudździa zadavoliŭ hetuju prośbu.
Braŭ tui, tarty i harodninu sa školnaha ŭčastka
Pieršy dzień pracesu syšoŭ na začytvańnie abvinavačańnia Uładzimiru Dranieŭskamu. Heta rabili pa čarzie dva dziaržabvinavaŭcy. Da abiedu paśpieli ahučyć tolki častku abvinavačvańnia.
Pieršyja try epizody ŭ kryminalnaj spravie Dranieŭskaha tyčacca jašče taho pieryjadu, kali jon kiravaŭ ŽKH u Čašnikach. Śledstva vyjaviła, što tady jon niezakonna atrymaŭ bolš za 3 tysiačy rubloŭ. Chabaru jamu davali ipešniki z Čašnikaŭ i pradstaŭniki dvuch firmaŭ ź Viciebska.
Dalejšyja dziejańni abvinavačany ździajśniaŭ užo kali byŭ kiraŭnikom rajona.
Tak, miascovy aŭtapark zapraŭlaŭ kiraŭniku rajona dyzielnym palivam jaho asabistaje Audi (u adnym epizodzie pradpryjemstva adpuściła nie mienš za 530 litraŭ, u druhim — 640 litraŭ), a taksama biaspłatna mianiaŭ humu na hetym aŭto.
U 2015 hodzie adździeł adukacyi kupiŭ dla Brasłaŭskaj himnazii kamputarny stoł za 344 rubli. Ale meblaj potym karystaŭsia Dranieŭski.
Kaledž u Vidzach biaspłatna vyrabiŭ dla kiraŭnika rajona mietaličny płot i kvietačnicy - i straciŭ na hetym 1098 rubloŭ.
Rajpo niekalki razoŭ pa ŭkazańni eks-čynoŭnika «častavali» jaho tartami «Napaleon» (kaštavaŭ jon 28 rubloŭ). A adnojčy ŭ «zamovie», akramia sałodkaha prezienta, byŭ faršyravany ščupak.
Z pryškolnaha ŭčastka Kanstalinskaj bazavaj škoły kiraŭnik rajona biaspłatna braŭ harodninu: morkvu, buraki, kapustu. U adnym vypadku pradukcyja kaštavała 28 rubloŭ, u druhim - 16 rubloŭ.
Sielsaviet z Opsy addaŭ Dranieŭskamu, pa jaho zahadzie, dźvie tui — a drevy pryznačalisia dla dobraŭparadkavańnia hetaha ahraharadka.
Ale bolš za ŭsich «šancavała» miascovamu ŽKH. Kamunalniki nie raz biaspłatna abo pa nižejšaj canie pieravozili hruzy, jakija naležali Dranieŭskamu. Zrabili jamu pryčep dla łodki (i panieśli vytraty ŭ 1626 rubloŭ), leśvicu (jana kaštavała 201 rubiel). Addali nianovuju mietaličnuju trubu (za 56 rubloŭ). «Padaryli» akumulatar dla akvaryuma (za 91 rubiel), dva zimovyja kaściumy dla rybałki i čaraviki (za 1113 rubloŭ).
Rabotniki ŽKH biaspłatna dobraŭparadkavali mahiłu babuli Dranieŭskaha: pastavili na mohiłkach stoł, łaŭku, mietaličnuju abharodku, pakłali tratuarnuju plitku. Usio heta abyjšłosia b eks-čynoŭniku ŭ 1539 rubloŭ.
Prysvojvaŭ častki premij padnačalenych. Žančynu, jakaja nie pryniesła «daninu», zvolniŭ
U 2015-2017 hadach kiraŭniki niekatorych haspadarak u Brasłaŭskim rajonie (u pryvatnaści, KFCH «Mižaziornaje», KUSP «Vidzaŭski») pavinny byli addavać najaŭnyja hrošy (zamiest zaličeńnia na rachunak rajvykankama) nibyta na praviadzieńnie mižnarodnaha fiestyvalu tradycyjnaj kultury «Brasłaŭskija zarnicy». Hrošy — u sumie nie mienš za tysiaču rubloŭ — pieradavali byłoj kiraŭnicy spraŭ rajvykankama Ludmile Ciaciery, a taja adnosiła Dranieŭskamu. Jon ža, na dumku śledstva, ich prysvojvaŭ.
Ad maja 2015 hoda da maja 2018-ha Dranieŭski sistematyčna prysvojvaŭ častki premij svaich namieśnikaŭ, a taksama načalnikaŭ roznych słužbaŭ u rajonie. Naprykład, rabotniku naležyła premija ŭ 400 rubloŭ — i 100 ź ich jon pavinien byŭ addać kiraŭniku rajona. «Daninu» z čynoŭnikaŭ źbirała kiraŭnica spraŭ. Ludmiła Ciaciera addavała načalniku i častku svajoj premii.
Kali spačatku eks-kiraŭnik prysvojvaŭ 200-300 rubloŭ ad čužych premij, dyk potym «ahulny zbor» z padnačalenych staŭ dachodzić amal da 1,5 tysiačy rubloŭ. U cełym takim čynam jon prysvoiŭ amal 6,2 tysiačy rubloŭ.
Aproč taho, Uładzimir Dranieŭski rasparadžaŭsia, kab padnačalenyja prynosili padarunki — nibyta dla ich dalejšaha ŭručeńnia roznym načalnikam, u tym liku ŭ abłvykankamie. Chtości pieradavaŭ raźbianaje draŭlanaje pano, chtości — kańjak, kavu, sadavinu, chtości — rybu, chtości — cukierki. Usio heta, na ahulnuju sumu bolš jak 4,1 tysiačy rubloŭ, kiraŭnik rajona, na dumku śledstva, prysvoiŭ.
Adpor Dranieŭski sustreŭ tolki ad adnoj padnačalenaj — tahačasnaha kiraŭnika rajonnaha abjadnańnia muziejaŭ. Jana pavinna była addać jamu svaju premiju, a taksama pano, vyrablenaje ramieśnikam. Adnak žančyna admoviłasia zrabić heta. Tady Dranieŭski zvolniŭ jaje. A paźniej zrabiŭ usio, kab jana nie znajšła pracu ŭ Brasłavie i rajonie. Žančynie daviałosia pracaŭładkavacca ŭ Połackim rajonie.
U 2018 hodzie siłaviki aryštavali taksama dvuch byłych namieśnikaŭ Dranieŭskaha.
Niadaŭna sud Hłybockaha rajona razhledzieŭ spravu adnaho ź ich — 36-hadovaha Maksima Čaharyna. Jaho abvinavačvali ŭ pieravyšeńni słužbovych paŭnamoctvaŭ. Prysud — 3 hady 3 miesiacy pazbaŭleńnia voli. Adnak były čynoŭnik atrymaŭ adterminoŭku na 2 hady 3 miesiacy. Pa viersii śledstva, Čaharyn dzialiŭ čužyja premii z Dranieŭskim.
4 śniežnia ŭ sudzie Hłybockaha rajona zasłuchajuć apošniaje słova druhoha byłoha staršyni Brasłaŭskaha rajvykankama — Michaiła Pliski. Jaho taksama abvinavačvajuć u pieravyšeńni słužbovych paŭnamoctvaŭ. Ad krasavika 2016 hoda da studzienia 2018-ha jon atrymaŭ chabar u sumie 6,3 tysiačy jeŭra za vyrašeńnie pytańniaŭ u svajoj kampietencyi.
