Eks-načalniku z SK dali šeść hadoŭ kałonii, choć prakuror prasiŭ try
Fota Dźmitryja Bruško
Abvieščany prysud pa spravie Andreja Kačura, byłoha načalnika adździeła centralnaha aparata Śledčaha kamiteta, piša Tut.by
Andreja Kačura pryznali vinavatym u padbuchtorvańni da dačy chabaru na sumu 25 tysiač dalaraŭ i prysudzili da šaści hadoŭ pazbaŭleńnia voli ŭ kałonii ŭzmocnienaha režymu. Dziaržabvinavaŭca prasiŭ dla byłoha supracoŭnika Śledčaha kamiteta try hady kałonii.
Andrej Kačur spakojna ŭspryniaŭ prysud. U sud jon pryjšoŭ ź vialikaj kletčataj torbaj z rečami — čakaŭ, što jaho voźmuć pad vartu prosta padčas abviaščeńnia prysudu. Padčas śledstva, nahadajem, jon znachodziŭsia na voli.
Nahadajem, u lutym 2019 hoda Andreju Kačuru byli vystaŭleny abvinavačańni ŭ karupcyjnym złačynstvie. U SK jon adkazvaŭ za kadravuju i ideałahičnuju pracu.
Staršynia SK Ivan Naskievič zajaŭlaŭ, što padstavaj dla adstaŭki abvinavačanaha stała infarmacyja, atrymanaja «ad sumiežnaha viedamstva» - pra karupcyjnaje złačynstva. Pastanovu ab zaviadzieńni kryminalnaj spravy padpisaŭ Naskievič, papiaredniaje śledstva pravodziła hrupa śledčych centralnaha aparata SK.
Pa viersii śledstva, da Kačura źviarnuŭsia jaho daŭni tavaryš — biznesoviec Andrej Kazačok, u dačynieńni da jakoha była zaviedziena kryminalnaja sprava ab uchileńni ŭ vypłacie padatkaŭ. Kazačok prasiŭ Kačura dapamahčy, toj damoviŭsia z načalnikam upraŭleńnia, jakoje rasśledavała spravu, Illoj Vałozinym, što taho nie voźmuć pad vartu i što prysud u vyniku nie budzie źviazany z abmiežavańniem abo pazbaŭleńniem voli. Košt pytańnia - 25 tysiač dalaraŭ. Andrej Kačur nastojvaje, što pieradaŭ Vałozinu ŭ dva etapy ŭsiu sumu, sabie ničoha nie prysvojvaŭ.
Kazačok ŭ vyniku atrymaŭ piać hadoŭ «chimii», jon da hetaha času adbyvaje pakarańnie i ličyć, što jaho «kinuli» na hrošy.
Kryminalnaja sprava pa fakcie atrymańnia chabaru nie zaviedziena. Illa Vałozin na voli i, pa našych dadzienych, nie źjaŭlajecca fihurantam kryminalnaj spravy. Adnak u vytvorčaści Śledčaha kamiteta jość sprava ab machlarstvie (č.4 art. 209 KK) - vierahodna, havorka idzie pra 25 tysiačach dalaraŭ, umovy pra toje, što Kazačok zastajecca na voli, nie vykanany.
Advakat Kačura i sam abvinavačany prasiŭ sud ab spahadzie, pakazvali na 20 hadoŭ «biezdakornaj» słužby byłoha supracoŭnika SK. Prysud u zakonnuju siłu nie ŭstupiŭ, moža być abskardžany i apratestavany.
