Zasnavalnik Wikipedia zapuściŭ novuju sacsietku, u jakoj nie budzie rekłamy
Zasnavalnik Wikipedia Džymi Uejłz zapuściŭ novuju sacyjalnuju sietku WT: Social. Z momantu startu ŭ kastryčniku jana ŭžo naličvaje bolš za 160 000 karystalnikaŭ, piša bbc.com.
Płatforma, jak ciapier abiacajuć, nikoli nie budzie pradavać dadzienyja karystalnikaŭ, a budzie isnavać na achviaravańni, kab abyścisia biez rekłamy.
Zarehistravacca možna pa zaprašeńni ci apłaciŭšy padpisku.
Sietka pazicyjanuje siabie jak navinnaja placoŭka. Akramia hetaha, karystalniki zmohuć redahavać častku kantentu, u tym liku zahałoŭki, što «ŭvodziać u zman» čytačoŭ.
Stužka budzie farmiravacca ŭ chranałahičnym paradku. Spačatku buduć źjaŭlacca samyja apošnija naviny, a nie tyja, jakija mohuć pryciahnuć uvahu aŭdytoryi.
Cana padpiski — 13 dalaraŭ za miesiac abo 100 dalaraŭ za hod.
«My damo vam mahčymaść vybirać kantent i redahavać padmannyja zahałoŭki ci prablemnyja paviedamleńni, — havorycca ŭ aficyjnym zvarocie WT: Social. — My budziem farmavać asiarodździe, dzie drennych udzielnikaŭ vydalać, tamu što heta pravilna, a nie tamu, što heta ŭpłyvaje na naš prybytak».
U niadaŭnim intervju Financial Times Uejłz nazvaŭ madel biznesu, aryjentavanuju na rekłamu i padtrymanuju hihantami socsietak, «prablematyčnaj».
«Niajakasny kantent vyjšaŭ u lidary», - skazaŭ jon.
U 2017 hodzie Džymi Uejłz zapuściŭ kraŭdsorsinhavuju navinnuju płatformu pad nazvaj Wikitribune, pryznačanuju dla baraćby z fejkavymi navinami.
Adnak, u kastryčniku 2018 raspuściŭ svaju kamandu žurnalistaŭ.
Na dumku śpiecyjalista pa sacyjalnych sietkach Zoi Kierns, sietcy pryjdziecca chutka «naroščvać abaroty», kab zarekamiendavać siabie jak žyćciazdolnuju alternatyvu hihantam.
«Dla hetaha spatrebicca šmat hrošaj, - skazała jana. — Ludzi pryvykli da biaspłatnaha dostupu da sacsietak. Dumaju, kampanii mohuć zapłacić, a voś zvyčajnyja ludzi pryvykli atrymlivać naviny chutka i biaspłatna».
