Prezident Litvy paznačyŭ čyrvonyja linii ŭ dyjałohu ź Biełaruśsiu
Prezident Litvy Hitanas Naŭsieda vykazvajecca za dyjałoh ź Biełaruśsiu, ale jon nazvaŭ «čyrvonyja linii» — Astravieckaja AES i pravy čałavieka. Ministr zamiežnych spraŭ Litvy Linas Linkiavičus skazaŭ, što ciažka pradbačyć, ci pryniasie taki dyjałoh na najvyšejšym uzroŭni stanoŭčyja vyniki, adnak horš dakładna nie budzie, piša Delfi.
«Prezident sklikaŭ kiraŭnikoŭ adkaznych viedamstvaŭ, parłamienckija palityčnyja partyi — jak kirujučyja, tak i apazicyjnyja, kab niefarmalna pahavaryć na aktualnyja pytańni źniešniaj palityki. Hetyja pytańni dyktuje žyćcio, i temy byli — Biełaruś i Ukraina.
U prezidenta było niekalki viestak dla kiraŭnikoŭ viedamstvaŭ. Što da Biełarusi, jon paŭtaryŭ, što adkryty dla dyjałohu, ale jon pavinien raźvivacca, nie pierastupajučy «čyrvonyja linii» — Astravieckaja AES i pravy čałavieka, — skazała daradca prezidenta Litvy pa pytańniach źniešniaj palityki Asta Skajshiryte.
Na pytańnie ab vybarach u Biełarusi jana skazała, što ni dla kaho nie sakret chod parłamienckich vybaraŭ u Biełarusi.
Linkiavičus patłumačyŭ, što pazicyja pa pytańni Astravieckaj AES nie mianiajecca.
«Acenka jaje niehatyŭnaja, usie našy namahańni nakiravany na toje — kab jana jak maha paźniej była zapuščana, i kali budzie pracavać, kab jaje zakryli, my naohuł ličym, što jaje budujuć z parušeńniem usich normaŭ, pryncypaŭ i mižnarodnych standartaŭ. Hetaja pazicyja nie mianiajecca», — skazaŭ litoŭski ministr. Adnak, pavodle jaho słoŭ, staŭleńnie da dyjałohu mianiajecca.
