U efiry BT nazvali miedycynskija dyjahnazy naziralnikaŭ. Heta ŭvohule zakonna?
16 listapada ŭ «Panaramy» na BT vyjšaŭ siužet, pryśviečany «ckavańniu arhanizataraŭ vybaraŭ». Rytoryka adpaviednaja: «psieŭdanaziralniki» i «psieŭdažurnalisty» nakidvajucca na sumlennych členaŭ kamisij. Aŭtar siužeta — Andrej Kryvašejeŭ, palityčny ahladalnik Ahienctva televizijnych navinaŭ Biełteleradyjokampanii.
fota z fejsbuka Andreja Kryvašejeva.
Ale byŭ adzin momant, jaki asabliva źviartaje na siabie ŭvahu: u efiry źjaviŭsia śpis kandydataŭ u členy kamisij, jakich nie dapuścili da ŭdziełu ŭ vybarach. Častku ź ich ŭ efiry BT nazvali «žulikami», a častku — chvorymi.
Kryvašejeŭ ahučyŭ proźviščy ludziej i raspavioŭ, što toj prachodziŭ kurs psichijatryčnaha lačeńnia, hety — psichična chvory.
«Niechta Vaźniak — jašče adzin bujny paśla psichijatryčnaha lačeńnia», — vykazaŭsia Kryvašeejeŭ.
Havorka išła pra Alaksieja Vaźniaka. Padrabiaznaści historyi apisaŭ jaho baćka, adzin ź lidaraŭ «Havary praŭdu» Siarhiej Vaźniak: chłopiec atrymaŭ ciažkija traŭmy ŭ vyniku DTZ. Lačyŭsia ciaham niekalkich hadoŭ, ale reabilitacyja prajšła paśpiachova. Siońnia Alaksiej Vaźniak — dziejazdolny, absalutna narmalny čałaviek.
Paśla vychadu siužeta na BT Vaźniak-starejšy sam pazvaniŭ Kryvašejevu. Jany sustrelisia, i palityk raspavioŭ žurnalistu historyju svajho syna.
«Ja bačyŭ, što historyja zrabiła na jaho ŭražańnie. Ja rastłumačyŭ, što syn moj nijaki nie «bujny». U vyniku traŭmy ŭ jaho była zusim inšaja prablema — poŭnaja strata pamiaci. Nastolki poŭnaja, što niekalki miesiacaŭ jon nie paznavaŭ nas z Volhaj — svaich baćkoŭ.
Z razmovy ŭ mianie skłałasia ŭražańnie, što Andrej ščyra škaduje, što dapuściŭ u dačynieńni da majho syna taki abraźlivy epitet. Pieradhistoryju jon nie viedaŭ. Kali b viedaŭ, nie dazvoliŭ by sabie takoj frazy.
Jon prynios mnie prabačeńni, jakija ja pryniaŭ», — paviedamiŭ Siarhiej Vaźniak.
Kryvašejeŭ apublikavaŭ u svaim fejsbuku post z vybačeńniami pierad Vaźniakami. Z udakładnieńniem: «vybačajusia za zališniuju emacyjnaść u tekście siužetu. Hrafičnaja i faktałahičnaja infarmacyja adpaviadaje rečaisnaści».
To-bok za toje, što skazaŭ «jašče adzin bujny», soramna, a za toje, što apubličyŭ miedycynskuju infarmacyju, — nie?
Jość i jašče pytańni.
Pa-pieršaje, pierad inšymi nazvanymi ŭ videa asobami Kryvašejeŭ vybačacca nie staŭ.
Pa-druhoje, a adkul u jaho ŭvohule miedycynskija dadzienyja? Heta ž parušeńnie tajamnicy pryvatnaha žyćcia, to-bok parušeńnie pravoŭ, harantavanych Kanstytucyjaj.
«Ja liču, što heta adnaznačna možna razhladacca jak razhałošvańnie infarmacyi ab pryvatnym žyćci: da jaje adnosicca i infarmacyja ab stanie zdaroŭja čałavieka, — paviedamiŭ «Našaj Nivie» advakat Siarhiej Zikracki. — Ale važnaje pytańnie: dzie žurnalisty ŭziali infarmacyju? Kali hetaja infarmacyja była ŭ adkrytym dostupie, to žurnalist nie parušyŭ zakon, choć, biezumoŭna, i parušyŭ etyčnyja normy. Kali ž jon, naprykład, atrymaŭ infarmacyju pra stan zdaroŭja čałavieka ad jaho doktara ŭ pryvatnym paradku, adkaznaść musiać nieści i lekar, i žurnalist».
Za ahučvańnie tajamnicy pryvatnaha žyćcia isnuje jak administratyŭnaje pakarańnie, tak i kryminalnaje (praŭda, damahčysia apošniaha davoli ciažka, treba dakazać, što byli parušanyja pravy paciarpiełaha ci naniesienaja škoda jaho intaresam).
Siarhiej Vaźniak skazaŭ «Našaj Nivie», što ŭ sud nie pojdzie, jamu dastatkova prabačeńniaŭ. Kaža, pabačyŭ, što Kryvašejeŭ zrazumieŭ svaju pamyłku.
Zatoje inšy naziralnik sa «śpisa Kryvašejeva» paviedamiŭ, što hetuju spravu tak prosta nie pakinie.
«Pakul što ja nie hladzieŭ hety videarolik. Ale, chutčej za ŭsio, ja budu źviartacca ŭ sud. Heta razhałošvańnie miedycynskaj tajamnicy», — paviedamiŭ Aleś Abramovič. Jaho Kryvašejeŭ nazvaŭ u svaim siužecie «psichična niezdarovym z 1985 hoda».
Ale ž jak aceniać etyčnaść videa kalehi Kryvašejeva? Tym bolš što jon sakratar dziaržaŭnaha Sajuza žurnalistaŭ.
«Ja sam hety videarolik nie bačyŭ. Ale ŭ nas jość Kamitet pa prafiesijnaj etycy. Kali jość niejkija pytańni, to nakiroŭvajcie ich aficyjna. Kamitet budzie ich razhladać i skaža, mieŭ racyju Andrej Jaŭhienavič [Kryvašejeŭ] ci nie», — paviedamiŭ «Našaj Nivie» namieśnik staršyni Sajuza žurnalistaŭ Siarhiej Śvierkunoŭ.
«NN» źviarnułasia pa kamientar i da samoha Andreja Kryvašejeva. Ale ž jon skazaŭ, što spačatku treba spytać dazvoł na razmovu ŭ pres-słužbie Biełteleradyjokampanii. Tam dazvołu nie dali.
«Žurnalist vykłaŭ svoj punkt hledžańnia ŭ pryvatnym akaŭncie, tamu my nie ličym patrebnym što-niebudź dadatkova kamientavać», — paviedamiła Śviatłana Smałonskaja-Kraskoŭskaja, kiraŭnik pres-słužby BT.
