87-hadovy dziadula pajechaŭ na rovary z sanatoryja i źnik. Jaho znajšli ŭ inšym sanatoryi
Na vychodnych stała viadoma pra žychara sanatoryja «Lasnoje» Dokšyckaha rajona, 87-hadovaha Alaksandra Mielnika, jaki prapaŭ 11 listapada. Praz 6 dzion znajšoŭsia ŭ inšym sanatoryi Viciebskaj vobłaści, piša kraj.by
Pažyły mužčyna ŭžo 30 hadoŭ žyvie ŭ sanatoryi-prafiłaktoryi «Lasnoje». 11 listapada jon źjechaŭ na rovary i źnik. Rabotniki «Lasnoha» zabili tryvohu, paśla hetaha ŭnučka piensijaniera zajaviła pra źniknieńnie dziaduli ŭ pošukava-vyratavalny atrad «Anioł».
Akazałasia, što piensijanier žyvy-zdarovy. Jaho znajšli 17 listapada ŭ inšym sanatoryi Viciebskaj vobłaści.
Kaardynatar «Anioła» Kryścina Kruk raspaviała kraj.by:
— U «Lasny» pryjechaŭ paštaljon, jaki pryvozić piensiju pažyłym žycharam hetaha prafiłaktoryja. Jany jamu i raspaviali, što Alaksandr Navumavič Mielnik źnik. Pačuŭšy hetuju navinu, paštaljon uspomniŭ, što, kali vydavaŭ Mielniku piensiju, toj skazaŭ: «Hetych hrošaj mnie chopić, kab pajechać adpačyć u inšy sanatoryj». I nazvaŭ jaho adras. Adrazu ž hetuju infarmacyju paviedamili svajakam.
Pa słovach Kryściny Kruk, unučka piensijaniera źviazałasia z sanatoryjem, u jakim źbiraŭsia adpačyć dziadula, i na tym kancy provada dali jamu słuchaŭku.
— Unučka prysaromiła dziadulu. Maŭlaŭ, tak rabić nielha, usio ž chvalujucca. Na heta Alaksandr Navumavič adkazaŭ, što navat i nie dumaŭ, byccam jaho stanuć šukać. Darečy, rovar, na jakim piensijanier źjechaŭ z «Lasnoha», taksama znajšoŭsia. Dziadula pryšpiliŭ jaho da niejkaha słupa, a sam dabraŭsia da miesca adpačynku ci to na spadarožnaj mašynie, ci to na hramadskim transparcie, — skazała Kryścina Kruk.
