Biełaruskija mamy pakazali, jak ich cieła źmianiłasia paśla rodaŭ FOTY
Fotaprajekt «Bačyć siabie» — pra žančyn i luboŭ da svajho cieła. U im źnialisia biełaruskija mamy, jakija pakazvajuć, jak źmianiłasia ich cieła paśla rodaŭ.
Fota Jelizaviety Miachiedka.
Aŭtarka prajekta Karyna Malinoŭskaja sama maładaja mama.
«Kali ja baču rekłamu «Viarni sabie formu paśla rodaŭ», uva mnie pračynajecca złość. Jakuju formu? Nikoli našy cieły nie buduć papiarednimi. Padhaniać u mifičnuju formu svajo cieła paśla rodaŭ žančyna nie pavinna. Jana ŭ pryncypie nie pavinny i da rodaŭ, i paśla, i bieź ich. Pavinna tolki samoj sabie — kłapacicca. Tamu ja chacieła pakazać nas — śmiełych, pryhožych, roznych mam», — kaža Karyna Malinoŭskaja.
Pad fota mamy dzielacca svaimi historyjami — pra chvalavańni nakont źmien u źniešnaści i pryniaćcie siabie.
«Spadziajusia, da nas dałučacca inšyja mamy. Pasprabujuć pahladzieć na svaju pryhažość inakš. Z pazicyi podźvihu maciarynstva. Tak, abvis žyvot, ale sa mnoj pobač moj cud — dačka. I kali ja hladžu ŭ jaje vočy, ja zabyvaju pra žyvot», — kaža mama 5-hadovaj dziaŭčynki Nadzieja Całaŭjova.
«Zusim niadaŭna pačała prymać svaje źmieny. Miaški pad vačyma, kudy ja składaju svaje sny pra spakoj i bieśpierapynny son, žyvot, baki, šnar ad KS, vałasy ŭ pučok. Ja zmahałasia z hetym usim u śmiarotnaj siečy, ale atrymała tolki ślozy i zryvy. Dla mianie heta istotna tamu, što paśla rodaŭ ja nie ŭlezła ŭ samy vialiki pamier džynsaŭ u kramie. Mnie tady ledź nie spłachieła ŭ prymieračnaj.
Pamiataju, jak namahałasia zašpilić nahavicy na parezanym žyvacie i płakała, bo adčuvała siabie takoj ahidnaj. I baluča ž było. A hetyja raściažki? Da ŭ mianie ŭsio adzieńnie alejem nabrałasia, a sensu nijakaha.
Vyhlad majho cieła mianie mocna biantežyŭ, chacia i skinuła 20 kh paśla rodaŭ. Jak było b pryŭkrasna mnie tady, na samym piakielnym pačatku pabačyć žančynu, jakaja abdymaje svajo małoje i lubić svajo cieła, jakoje pamianiałasia, ale zastałosia samym rodnym. Moža, choć adna pani nie zapłača ad taho, što ŭžo nie taja, daść šanc sabie novaj», — dzielicca inšaja hierainia Maryja Hryc.
