Tramp sastupaje piaci mahčymym supiernikam na vybarach
Amierykanski lidar Donald Tramp sastupaje pa papularnaści siarod vybarščykaŭ pieciarym demakratam, jakija mohuć stać jaho supiernikami na majučych adbycca ŭ listapadzie 2020 hoda prezidenckich vybarach. Pra heta śviedčać apublikavanyja ŭ aŭtorak vyniki apytańnia hramadskaj dumki, praviedzienaha sacyjałahičnaj słužbaj Langer Research Associates na zamovu telekampanii NBC i haziety The Washington Post, piša tass.ru.
Pavodle hetych acenak, samyja vysokija šancy na vyłučeńnie kandydatam u prezidenty ZŠA ad Demakratyčnaj partyi pa-raniejšamu majuć piać palitykaŭ. Havorka idzie pra byłoha vice-prezidenta Džozefa Bajdena, sienatara ad štata Viermont Bierni Sandersa, sienatara ad Masačusietsa Elizabet Uoren, mera horada Saŭt-Benda (štat Indyjana) Pita Butedžadža i sienatara ad Kalifornii Kamału Charys. Jany na praciahu ŭžo niekalkich miesiacaŭ ličacca lidarami pieradvybarnaj honki siarod demakrataŭ.
Jak śviedčać vyniki apytańnia, kali b vybary prezidenta ZŠA adbylisia zaraz, Tramp prajhraŭ by kožnamu ź piaci nazvanych palitykaŭ. Kali b kandydatam ad demakrataŭ vyłučyli Bajdena, jon atrymaŭ by 56% hałasoŭ vybarščykaŭ, a Tramp - 39%. Takija ž vyniki byli b i ŭ tym vypadku, kali b supiernikam Tramp staŭ Sanders.
Uoren pieramahła b Trampa, nabraŭšy 54%, vynik respublikanca skłaŭ by 39%. Butedžadž atrymaŭ by pieramohu nad Trampam pry suadnosinach 51% da 40% hałasoŭ na karyść demakrata. Charys vyjhrała b na vybarach pry suadnosinach hałasoŭ 52% da 41%.
Tramp raniej nieadnarazova zajaŭlaŭ, što nie ličyć vartymi davieru vyniki sacyjałahičnych apytańniaŭ, zroblenych na zamovu šerahu viadučych ŚMI. Na dumku kiraŭnika Biełaha doma, jaho palityčnyja apanienty schilnyja vydavać žadanyja vyniki za sapraŭdnyja.
