WSJ: Pahłynańnie Biełarusi pryviadzie da źmieny bałansu sił u Jeŭropie
Krainy Zachadu aścierahajucca pierśpiektyvy pahłynańnia Biełarusi Rasijaj, bo heta moža źmianić bałans sił u Jeŭropie, piša The Wall Street Journal.
Zachodnija ŭrady imknucca ŭmacavać supracoŭnictva ź Biełaruśsiu, adnak navat takoje nievialikaje partniorstva maje svaje miežy: na Zachadzie aścierahajucca, što zbližeńnie Minska z Zachadam moža spravakavać rasijskuju interviencyju.
U toj čas jak zachodnija ministerstvy zamiežnych spraŭ nastrojeny na zbližeńnie i padtrymku niezaležnaści Minska, niekatoryja vajskovyja načalniki NATA hladziać na heta sa skiepsisam.
«Ich uzrovień supracoŭnictva z Rasijaj pakidaje nam mała pola dla manieŭru», — skazaŭ hienierał-lejtenant Rajmund Andžejčak.
«Heta absalutna nievierahodnaja intehracyja, uličvajučy ŭsie elemienty, sistemy kamandavańnia i kantrolu», — skazaŭ Andžejčak.
«Situacyja surjoznaja ŭ tym płanie, što Rasija, mahčyma, pasprabuje prymusić ich abjadnacca, — pryviała hazieta mierkavańnie ministra zamiežnych spraŭ Polščy Jaceka Čaputoviča. — Na ich akazvajuć nacisk i nastaŭ čas dla ES, dla Polščy i dla inšych krain padtrymać ich suvierenitet». Pavodle jaho słoŭ, Biełaruś — «heta kraina, dzie nieabchodny reformy, ale zaraz varta nadać uvahu bolš surjoznym pytańniam».
U svaju čarhu były pamočnik ministra abarony ZŠA Alaksandr Vieršbaŭ zajaviŭ, što «nichto nie maje iluzij» z nahody taho, što ŭłady Biełarusi «pojduć takim samym kursam, jak Ukraina ci Hruzija», jakija pajšli na zbližeńnie ź ES. «Adnak, kali jany choć niejak uskładniać raźliki Rasii i kali jany sapraŭdy akažuć materyjalnuju i palityčnuju padtrymku ŭkrainskamu suvierenitetu, to heta budzie zusim nie drobnym pytańniem», — pracytavała vydańnie Vieršbaŭ, jaki zajmaŭ u 2012-2016 hadach pasadu namieśnika hienieralnaha sakratara NATA.
Pavodle jaho słoŭ, krainam Zachadu varta prajaŭlać aściarožnaść i nie stvarać uražańni ab zanadta ciesnych suviaziach ź Minskam, pakolki heta vyklikała b žorstkuju reakcyju Rasii.
