Achoŭnyja ekrany ŭ minskim mietro ŭ najbližejšaj budučyni źjaviacca tolki na treciaj linii
Ustanoŭka achoŭnych ekranaŭ na płatformach pieršaj i druhoj linij minskaha mietro — pytańnie nie samaj blizkaj budučyni. Takoje mierkavańnie vykazaŭ dyrektar «Minskaha mietrapalitena» Uładzimir Sotnikaŭ, adkazvajučy na pytańni žurnalistaŭ, pieradaje sb.by.
— Achoŭnyja ekrany jość u prajekcie treciaj linii, — skazaŭ U.Sotnikaŭ. — Pry ŭvodzie jaje ŭ ekspłuatacyju jany pačnuć dziejničać. Što tyčycca pieršaj i druhoj linij, to hetaje pytańnie prapracoŭvajecca. Adnak treba skazać, što infrastruktura ciapier dziejučych linij technična nie prystasavanaja da vykarystańnia achoŭnych ekranaŭ, jak i da aŭtakiravańnia ciahnika.
Pra toje, što achoŭnyja ekrany płanujecca ŭstalavać na Maskoŭskaj i Aŭtazavodskaj linijach staličnaj padziemki, raniej paviedamlali «Minsk-naviny» sa spasyłkaj na hałoŭnaha inžyniera dyrekcyi pa budaŭnictvie Minskaha mietrapalitena Alaksieja Murača.
U toj ža čas, pa słovach Sotnikava, adaptacyja achoŭnych ekranaŭ da ciapier dziejučaj struktury mietrapalitena — «praces vielmi darahi».
— Kali hetaja sistema źjavicca na pieršych dźviuch linijach, pakaža čas, — reziumavaŭ jon.
Achoŭnyja ekrany na stancyjach mietro — aŭtamatyčnyja dźviery pamiž płatformaj i rejkami. Jany pryznačanyja dla praduchileńnia padzieńnia pasažyraŭ na rejki. Miarkujecca, što kanstrukcyja budzie ź lohkich materyjałaŭ i spłavaŭ, a vyšynia płatformiennych dźviarej składzie 170 sm. Prybyvajučy na stancyju, ciahnik budzie spyniacca prosta nasuprać stancyjnych dźviarej, jakija adkryvajucca i začyniajucca adnačasova ź dźviaryma sastavu.
