Stała viadoma, čamu rasijskaja jadziernaja «Bułava» nie moža stralać na zachad
Mižkantynientalnuju balistyčnuju rakietu (MBR) «Bułava» ni razu ad 2005 hoda nie zapuskali z uschodu na zachad pa niekalkich pryčynach, paviedamlaje hazieta «Viedomosti».
Blizkija da hałoŭnaha štabu VMF RF krynicy patłumačyli, što rakiety zapuskajuć ź Biełaha abo Barancavaha mora na Kamčatku dziela zručnaści. Atamnyja padłodki stratehičnaha pryznačeńnia prajekta 955A «Barej-A», ź jakich ažyćciaŭlajecca zapusk «Bułavy», budujucca ŭ Archanhielskaj vobłaści na zavodzie «Sievmaš», tamu vyprabavańni zručniej pravodzić kala zavoda-vytvorcy, kab pry nieabchodnaści adpravić submarynu ŭ dok dla likvidacyi niedachopaŭ.
Akramia hetaha treba madernizavać palihon Čyža ŭ Archanhielskaj vobłaści, pa jakim budzie stralać «Bułava» ŭ vypadku zapusku z uschodu. Heta dazvolić maksimalna dakładna fiksavać prylot bajavych błokaŭ rakiety.
Taksama krynicy miarkujuć, što palihon Čyža znachodzicca pad bolš ščylnym nahladam zamiežnaj vyviedki. Z-za hetaha na archanhielski palihon zapuskajuć rakiety starych madyfikacyj.
Pra toje, što «Bułava» nie moža stralać z uschodu na zachad, stała viadoma 31 kastryčnika. Tady adznačałasia, što majucca na ŭvazie tolki techničnyja abmiežavańni.
MBR R-30 «Bułava-30» raspracavana Maskoŭskim instytutam ciepłatechniki dla ŭzbrajeńnia rakietanoscaŭ prajekta 955 «Barej». Vyprabavańni zbroi pačalisia ŭ 2004 hodzie.