Ukraina hatovaja spynić tranzit rasijskaha hazu
Pa słovach ministra Alaksieja Oržala, u schoviščach krainy znachodzicca «rekordnaja kolkaść hazu», tamu Kijeŭ hatovy da spynieńnia tranzitu z Rasijaj. Ale padpisańnie novaj damovy, pa jaho słovach, zastajecca pryjarytetam, piša rbc.ru.
Kijeŭ hatovy spynić tranzit rasijskaha hazu, bo ŭ jaho padziemnych schoviščach «rekordnaja kolkaść» zapasaŭ. Pra heta ŭ efiry prahramy «Svaboda słova» na telekanale ICTV zajaviŭ kiraŭnik ukrainskaha Minenierha Alaksiej Oržal.
Pavodle jaho słoŭ, va ŭkrainskich schoviščach znachodzicca 21,7 młrd kub. m. Oržal adznačyŭ, što Ukraina ni ŭ jakim razie nie vyklučaje padpisańnia damovy na tranzit hazu z Rasiejaj, bo atrymańnie za jaho srodkaŭ źjaŭlajecca pryjarytetam dla krainy.
Ministr raspavioŭ, što Kijeŭ aktyŭna pracuje z partniorami ź Jeŭropy, kab padpisać damovu z «Hazpromam» pa novych jeŭrapiejskich praviłach. Pavodle jaho słoŭ, zhodna z hetym pryncypam, Ukrainu «nielha šantažavać». Jon dadaŭ, što kali Kijeŭ zabiaśpiečvaje bieśpierabojny tranzit hazu ŭ Jeŭropu, to pavinna być kankurencyja i źnižeńnie cany dla jeŭrapiejskich spažyŭcoŭ.
U pačatku lipienia kiraŭnik «Naftahaza» Andrej Kobaleŭ zajaŭlaŭ, što va Ukrainie źjavicca ryzyka technahiennaj katastrofy, kali ŭ jaje schoviščach nie budzie 20 młrd kub. m. hazu. Pa słovach kiraŭnika kampanii, jany dazvolili b Ukrainie prajści aciaplalny siezon navat pry spynieńni Rasiejaj tranzitu hazu z pačatku 2020 hoda. Letam va ŭkrainskich schoviščach znachodzilisia 13,8 kub. m hazu.
Damova ab tranzicie hazu pamiž Kijevam i Maskvoj zakančvajecca ŭ kancy 2019 hoda.
