Sud u Breście prysudziŭ 17 hadoŭ kałonii rasijancy, što viezła praź miažu 100 kh narkotykaŭ
U sudzie Bresckaha rajona siońnia abviaścili pryhavor rasijancy, jakaja pieravoziła praź miažu najbujniejšuju za apošnija 25 hadoŭ partyju psichatropaŭ i narkotykaŭ, paviedamlaje BiełTA.
38-hadovaja žycharka Maskvy była zatrymanaja 2 maja ŭ punkcie propusku «Damačava». Rasijanka śledavała z Polščy na aŭtamabili Chrysler pa čyrvonym kalidory, pradstaviŭšy da dekłaravańnia elektrasamakat i padłohavy kandycyjanier. Adnak pry ahladzie aŭtamabila byŭ znojdzieny schavany ad kantrolu tavar.
Razam z supracoŭnikami pamiežnaj słužby ŭ sałonie ŭ bahažniku aŭto byli vyjaŭlenyja śpiecyjalnyja tajniki. Z kanstruktyŭnych adsiekaŭ dastali 100 palimiernych upakovak ahulnaj vahoj kala 99,8 kh MDMA, a taksama try palimiernyja brykiety sa spresavanym rečyvam (357 h) — hašyšam.
Heta samaja bujnaja partyja psichatropnych rečyvaŭ, vyjaŭlenych na biełaruska-polskaj miažy za apošnija 25 hadoŭ.
Sud pryznaŭ rasijanku vinavataj u zachoŭvańni, pieravozcy, a taksama pieramiaščeńni praz mytnuju miažu narkatyčnych srodkaŭ i asabliva niebiaśpiečnych psichatropnych rečyvaŭ u bujnym pamiery, heta značyć u ździajśnieńni złačynstvaŭ, praduhledžanych č.3 art.328 i č.2 art.328-1 KK. Pa sukupnaści złačynstvaŭ joj pryznačana pakarańnie ŭ vyhladzie 17 hadoŭ pazbaŭleńnia voli z adbyvańniem u papraŭčaj kałonii ahulnaha režymu.
Prysud nie ŭstupiŭ u zakonnuju siłu i moža być abskardžany i apratestavany ŭ apielacyjnym paradku va ŭstanoŭleny termin.