Aŭtarka «ekśpiertyzy», pavodle jakoj Sieviarynca adličyli z PENa: Heta była nie ekśpiertyza, a pryvatny kamientar
Rada PEN-Centra 29 kastryčnika adličyła z šerahaŭ arhanizacyi palityka i piśmieńnika Paŭła Sieviarynca. U aficyjnym tłumačeńni, čamu Sieviarynca adličyli z PENa, značycca taki punkt: «Publična, sistematyčna dyskryminavałasia sacyjalnaja hrupa ŁHBTK+, što paćviardžajecca vonkavaj ekśpiertyzaj i parušaje p.3 Chartyi Mižnarodnaha PEN-Kłuba, jaki abaviazvaje siabroŭ našaj arhanizacyi «ŭsimi siłami zmahacca suprać lubych prajavaŭ nianaviści».
Kiraŭnictva PEN-Centra spasyłajecca na vonkavuju ekśpiertyzu i pakidaje spasyłku na hetuju pracu.
Vijaleta Jermakova. Fota gaypress.by.
Ekśpiertyzu praviała Vijaleta Jermakova, udzielnica inicyjatyvy «Žurnalisty za talerantnaść».
Što heta za supołka? Jana pravodzić pastajannyja manitorynhi ŭsiaho, datyčnaha da ŁHBT-supolnaści i «movy varožaści». Vyniki čaściakom krytykujucca žurnalisckaj supolnaściu za sprečnyja traktoŭki.
Čytajcie. «Žurnalisty za talerantnaść» zaklikajuć «Našu Nivu» nie cytavać patryjarcha Kiryła, Trampa i Daškieviča
«Naša Niva» źviarnułasia pa kamientar da Vijalety Jermakovaj, kab jana patłumačyła, jak i čamu rabiła hetuju ekśpiertyzu.
«A heta nie była «ekśpiertyza». U mianie ŭ pryvatnym paradku ŭziali kamientar. Kamu i navošta patrebna było nadavać jamu status ekśpiertyzy, ja nie viedaju. Nakolki ja razumieju, pytańnie ab vyklučeńni Paŭła Sieviarynca z PENa prymajecca hałasavańniem paśla abmierkavańnia. Moj kamientar ja razhladaju jak repliku ŭ hetym abmierkavańni», — skazała spadarynia Jermakova.
«Ekśpiertyzu» ŭ Vijalety Jermakovaj zamaŭlała pieršaja namieśnica staršyni PEN-Centra Taćciana Niadbaj.
«Pa paradzie kalehaŭ z BAŽa ja źviarnułasia da arhanizacyi «Žurnalisty za talerantnaść» z prośbaj praanalizavać artykuł Paŭła Sieviarynca. Atrymała hetuju acenku teksta ŭ adkaz i paličyła heta ekśpiertyzaj u tym sensie, što heta analiz, razhlad pytańnia ekśpiertkaj.
Dapuskaju, toje, što źjaŭlajecca ekśpiertyzaj u jurydyčnym sensie («sapraŭdnaja ekśpiertyza»), mahło b utrymlivać bolš navukovaści, ale naŭrad ci źmianiłasia b sama madalnaść acenki. Tamu hetaha kamientara ekśpiertki sa źniešniaj arhanizacyi nam dastatkova dla padmacavańnia našaj pazicyi», — adkazała Taćciana Niadbaj.
Staršynia BAŽ Andrej Bastuniec zapeŭniŭ «NN», što nichto z PENa nie źviartaŭsia da kiraŭnictva žurnalisckaj arhanizacyi z pytańniem pra ekśpiertyzu. «U nas 1300 siabroŭ. Mahčyma, Jermakovu paraiŭ niechta z tych ludziej, chto pravodziŭ kampaniju pa vykaranieńni movy varožaści. Kali karotka, to jany sami heta pryznajuć, što termin «mova varožaści» jany ŭžyvajuć vielmi šyroka. Nie z pravaabarončaha hledzišča, a z sacyjałahičnaha», — patłumačyŭ jon.
Čytajcie: Rudkoŭski žorstka vykazaŭsia pra ekśpiertyzu, na padstavie jakoj Sieviarynca vyklučyli z PEN-Centra
