Minski ajcišnik zrabiŭ sajt-navihatar, dzie lohka adšukać aŭdyjaknihi na biełaruskaj movie
Prajekt «Biełaruskaja litaratura ŭ aŭdyjaknihach» zrabiŭ veb-dyzajnier Alaksiej Čarankievič. Pracavaŭ nad im ź vieraśnia.
«Dzieści paŭtara miesiaca tamu Ministerstva infarmacyi apublikavała ŭ adkrytym dostupie bolš za sotniu aŭdyjaknih na biełaruskaj movie. Heta vialikaja ščodraść ź ich boku, uličvajučy, što jakaść zapisu ŭ knih dosyć dobraja. Ale mianie zasmuciŭ adzin momant: knihi byli apublikavanyja prosta jak papka z mp3-fajłami na Google Drive. U hetym miescy zakapanaja paračka prablem: takuju spasyłku niemahčyma zapomnić, papka nie praindeksujecca pošukavikami, aŭdyjaknižka moža być aformlena lepš.
Ja napisaŭ elektronny list u ministerstva z prapanovaj paŭnavartasna aformić taki reliz (jak sami aŭdyjaknižki, tak i staronku, dzie ich možna spampavać). Ale, napeŭna, list niedzie zhubiŭsia ci ja byŭ niedastatkova nastojlivy.
Amal adrazu byŭ płan «B» — niaprošany partyzanski sajt-navihatar sa śpisam aŭdyjaknih, spasyłki ź jakoha prosta viali b na peŭnyja fajły hetaj samaj papki na Google Drive. Ja tak i pastupiŭ. I pašyryŭ pieršapačatkovuju ideju da śpisu aŭdyjaknižak na biełaruskaj movie, jakija jość u bajnecie (i nie schavanyja za rar-archivy, sms i rehistracyi).
Takim čynam prosta ciapier u indeksie jość 177 knižak. Śpis z časam budzie papaŭniacca», — napisaŭ Alaksiej Čarankievič na fejsbuku.
Alaksiej Čarankievič.
Akramia zapisaŭ Mininfarma, jość spasyłki na aŭdyiaknihi z knihi.by i «Radyjo Svabody». Sajt-navihatar nie zachoŭvaie u siabie fajły, tamu nie parušaie aŭtarskich pravoŭ.
«Mnie padabajecca rabić niekamiercyjnyja rečy pa-za pracaj. Zvyčajna ideja idzie ad prablemy. Nu i tema biełaruskaj kultury dla mianie nieabyjakavaja. Voś i atrymlivajucca takija prajekty na styku dyzajnu i biełaruskaj kultury. Chočacca vykarystoŭvać toje, što ŭmieješ, u karysnych metach», — patłumačyŭ «Našaj Nivie» IT-dyzajnier.