Chrapavicki: Sučasnyja levyja chvarejuć na maksimalizm
Padčas pasiedžańnia Rady PEN-Centra, jakaja vyklučyła Sieviarynca.
«Sieviarynca taki vyklučyli. Napiaredadni «Nočy rasstralanych paetaŭ». Niaŭžo nielha było rašeńnie hetaha pytańnia pieranieści na niejki inšy čas? — pytajecca paet Andruś Chrapavicki, jaki sam paśladoŭna krytykavaŭ Sieviarynca ź levych, ateistyčnych pazicyj. — Sučasnyja levyja časta chvarejuć na maksimalizm. Kali ty zrabiŭ niejkaje nieaściarožnaje vykazvańnie (albo navat nie padtrymaŭ adzin niejki punkcik z 10), to ty ledźvie nie fašyst. A mo navat i nia ledźvie. Krok uprava — rasstreł.
Levyja vystupajuć za abaronu mienšaściaŭ. Z hetym usio było b dobra, kali b jany nie zabyvalisia na mienšaści ŭnutry mienšaściaŭ. Naprykład, pravy ŁHBT my hołasna adstojvajem suprać chryścijanskich fundamientalistaŭ, ale maŭčym pra pryciaśnieńnie pravoŭ hiejaŭ u musulmanskich supolnaściach. Mnohija levyja ŭ Zachodniaj Eŭropie stali pravadnikami isłamizmu ŭ Eŭropie, całkam zabyŭšysia na pravy žančyn, hiejaŭ i apostataŭ unutry musulmanskaj supolnaści.
Budzie darečna pryhadać, jak Southern Poverty Law Center (viadomaja amerykanskaja pravaabaronaja arhanizacyja ź levym uchiłam) zaniesła Madžyda Navaza, viadomaha isłamskaha refarmatara, jaki vystupaje za bolš liberalnaje, niepalityčnaje traktavańnie isłama) u śpis anty-musulmanskich ekstremistaŭ. Heta, ludzi, prosta tryndziec. Čałavieka, jaki zmahajecca za deradykalizacyju isłamskich supolnaściaŭ, zaličyli u śpis ekstremistaŭ! Potym toj adstojvaŭ svaje pravy ŭ sudzie i pieramoh. Suma kampensacyi skłała 3,4 miljona dalaraŭ.
Voś hetaja niazdatnaść abaraniać mienšaści ŭnutry mienšaściaŭ časam pryvodzić da ihnaravańnia prablemaŭ žančyn, ateistaŭ, apostataŭ, habrejaŭ, chryścijan.
Niajasna, što rabić ludziam, jakija da toj ci inšaj mienšaści ci represavanaj hrupy nie naležać? Chočaš, kab ciabie šanavali, zaličy siabie da niejkaj hrupy ź niemejnstrymavaj identyčnaściu. Tady ty znojdzieš i abaronu, i padtrymku. Levyja časta niazdatnyja ŭbačyć u tabie prosta čałavieka, indyvida. Ty abaviazkova musiš być častkaj niejkaj hrupy identyčnaści.
Prychod da ŭłady Trampa, padjom novych pravych u Eŭropie — heta symptom chvaroby sučasnych levych. Mnohija, vielmi mnohija vybarcy bačać radykalizacyju i maksimalizm levych, ihnaravańnie prablem i strachaŭ hrupaŭ, jakich levyja nie zaŭvažajuć albo zaličvajuć u «klasavyja vorahi».
Navat nie chaču kranać temy «deplatforming», cenzury na kampusach, dohmaŭ levych ruchaŭ, Brekzitu, antysemityzmu i h.d.
Pakul što ja kazaŭ pra eŭrapiejska-amerykanski kantekst levaha ruchu. Pra biełaruskich levych skažu chiba toje, što jany, imcho, vielmi i vielmi raźjadnanyja. Jość praeŭrapiejskija siły. Ale ich mała i jany słabyja. Tady jość inšyja levyja. Jakija za režym. Z pravymi takoha raznaboju niama.
Što ž tyčycca akademičnaj supolnaści i dziejačoŭ kultury, na Zachadzie ŭžo daŭno — heta pieravažna ludzi ź levymi pohladami. U Biełarusi pastupova da hetaha idzie taksama. Tamu, mahčyma, «chryścijanski nastup» na Pen-Centr i nie atrymaŭsia», — piša Chrapavicki.
