Biełaruś nie atrymaje 200 miljonaŭ dalaraŭ siomaha tranšu ad JEFSR
Biełaruś bolš nie moža pretendavać na atrymańnie 200 młn dalaraŭ apošniaha, siomaha tranšu kredytu JEFSR, paviedamili TUT.BY u pres-słužbie Jeŭrazijskaha banka raźvićcia.
«Pieryjad dastupnaści srodkaŭ finansavaha kredytu sa srodkaŭ JEFSR Respublicy Biełaruś minuŭ 30 červienia 2019 hoda, i z pytańniem ab jaho dalejšym praciahu Minfin RB da ŭpraŭlajučaha nie źviartaŭsia. Z ulikam hetaha, dyskusii pa pytańni 7 tranšu nie majuć jurydyčnaj padstavy», — havorycca ŭ paviedamleńni.
Nahadajem, što raniej paviedamlałasia, što Minsk jašče da kanca krasavika raźličvaŭ atrymać ad Jeŭrazijskaha fondu stabilizacyi i raźvićcia siomy tranš. U kancy krasavika ekśpierty JEFSR zajavili, što Minsk zapaźniŭsia z vykanańniem umoŭ atrymańnia tranšu, nie ŭ termin uniosšy ŭ parłamient novy prajekt zakona ab bankructvie. U Minfinie Biełarusi zapeŭnivali, što ŭsie ŭmovy vykanali ŭ termin.
I choć paźniej ministr finansaŭ Rasii Anton Siłuanaŭ zapeŭnivaŭ, što i 200 młn dalaraŭ kredytu JEFSR, i 600 młn dalaraŭ dziaržkredytu Minsk atrymaje, hrošy tak i nie pryjšli. Ich atrymańnie akazałasia pryviazana da tempaŭ «intehracyjnych pracesaŭ», a padpisańnie adpaviednych darožnych kart čakajecca ŭ śniežni hetaha hoda.
Biełaruś užo atrymała 1,8 młrd dalaraŭ ad JEFSR. U suviazi z tym, što terminy pradastaŭleńnia kredytu pieranosilisia, u pačatku hoda rada JEFSR uniesła źmieny ŭ prahramu reformaŭ u Biełarusi, što padtrymlivajecca finansavym kredytam JEFSR na 2 młrd dalaraŭ.