Redkaja sava zalacieła ŭ ofis na poŭnačy Biełarusi
Redki vid savy nie tolki pabačyli, ale i źniali na videa: 21 kastryčnika sipucha zalacieła ŭ ofis u Vierchniadźvinskim rajonie, paviedamlaje APB.
Viktar Razumny, jaki naziraŭ ptušku, raskazaŭ, što jana zalacieła ŭ kabiniet praz akno, jakoje pakinuli na noč adčynienym. Jana nie duža bajałasia čałavieka.
«Ranicaj ja ŭvajšoŭ u kabiniet i zaŭvažyŭ ptušku. Spačatku jana krychu spužałasia, uźlacieła, ale potym pavodziła siabie spakojna. Ja adčyniŭ dźviery na bałkon, kab jaje vypuścić, jana pasiadzieła krychu i potym źlacieła. Ja pačaŭ šukać infarmacyju pra hety vid u internecie, i vielmi ŭraziŭsia: heta vielmi redki ŭ Biełarusi vid, asabliva na poŭnačy».
Sapraŭdy, sipucha — adzin z samych redkich vidaŭ sovaŭ u Biełarusi, što ŭ nas hniazdujucca. U XXI stahodździ było viadoma tolki dva miescy hniezdavańnia sipuchi, ale sioleta faktaŭ hniezdavańnia ptuški paćvierdžana nie było, samu sipuchu taksama jašče nie bačyli, tolki ślady jaje žyćciadziejnaści ŭ miescy adpačynku na poŭdni Biełarusi.