Parłamienckija vybary ŭ Šviejcaryi pryviali da ŭzmacnieńnia «zialonych»
Na vulicy Ciurycha. Fota: Lewin Bormann / wikimedia.org
U Šviejcaryi ŭ niadzielu, 20 kastryčnika, adbylisia parłamienckija vybary, piša Deutsche Welle.
Pavodle papiarednich nieaficyjnych vynikaŭ, značnaha pośpiechu na vybarach damahlisia abiedźvie partyi «zialonych» — Partyja «zialonych» Šviejcaryi i Partyja «zialonych» libierałaŭ Šviejcaryi. U sumie jany atrymali 20,3% hałasoŭ, što na 8,6% vyšej za vynik na vybarach 2015 hoda.
Pravakansiervatyŭnaja Šviejcarskaja narodnaja partyja (ŠNP), jakaja na minułych vybarach atrymała amal 30% hałasoŭ, trochi pahoršyła svaje pakazčyki — pavodle papiarednich nieaficyjnych źviestak, jaje padtrymali 26,3% vybarščykaŭ, jaki prahałasavali. Adnak ŠNP zastaniecca najmacniejšaj partyjaj.
Pośpiechi «zialonych» naŭrad ci paŭpłyvajuć na rasstanoŭku sił va ŭradzie. U Šviejcaryi praŭleńnie ŭžo amal 60 hadoŭ ažyćciaŭlajecca čatyrma amal roŭnymi pa vieličyni partyjami na asnovie kansiensusu. Vykanaŭčaja ŭłada naležyć Fiederalnaj radzie, jakaja składajecca z 7 čalcoŭ. Pazicyi toj ci inšaj partyi ŭ Fiederalnaj radzie karektujucca tolki paśla značnych pośpiechaŭ na dvuch vybarach zapar.
Mienavita tak było ŭ vypadku z ŠNP, jakaja atrymała druhoje miesca ŭ Fiederalnaj radzie tolki paśla taho, jak amal padvoiła kolkaść atrymanych hałasoŭ na dvuch vybarach u pieryjad z 1995 pa 2003 hod.
Aktyŭnaść vybarščykaŭ na vybarach u apošni čas składała mienš za 50%. Palitołahi tłumačać heta tym, što šviejcarcy majuć prava ŭdzielničać u hałasavańniach i refierendumach nie mienš jak čatyry razy ŭ hod.
