Dziela čaho ZŠA pierakidvajuć svaich vajskoŭcaŭ ź Siryi ŭ Irak
Foto: U.S. AIR FORCE
Vašynhton planuje pieranakiravać u Irak tych vajskoŭcaŭ, jakich jon vyvodzić z paŭnočnaha ŭschodu Syryi. Pra heta zajaviŭ ministar abarony ZŠA Mark Esper, pieradaje «Svaboda».
Pavodle jaho słovaŭ, havorka idzie pra bolš za 700 vajskoŭcaŭ. Jany buduć raźmieščany na zachadzie Iraku, dzie praciahnuć zmahacca z terarystyčnaj hrupoŭkaj «Isłamskaja dziaržava».
Syryjskaje dziaržaŭnaje ahienctva SANA paviedamlaje, što amerykanskaja transpartnaja kalona ŭ niadzielu, 20 kastryčnika, zajechała na terytoryju Syryi z boku Paŭnočnaha Iraku. Jana zavieršyć evakuacyju vajennych baz ZŠA z terytoryi, dzie Tureččyna pravodzić svaju vajennuju aperacyju.
U kalonie, pa dadzienych ahienctva, kala 100 hruzavikoŭ, ich supravadžaje vajskovaja achova. Taksama paviedamlajecca, što napiaredadni amerykanski kanvoj vypraviŭsia ŭ bok Iraku z syryjskich pravincyj Alepa i Raka.
9 kastryčnika Tureččyna pačała vajennuju aperacyju suprać kurdaŭ na poŭnačy Syryi. Ankara ličyć uzbrojenyja kurdzkija farmiravańnia terarystami. Vašynhton, naadvarot, ličyć kurdaŭ svaimi sajuźnikami ŭ baraćbie z «Isłamskaj dziaržavaj».
Ab vyvadzie amerykanskich vojskaŭ z poŭnačy Syryi prezydent ZŠA Donald Tramp abviaściŭ napiaredadni pačatku tureckaj aperacyi. Mnohija kanhresmeny asudzili rašeńnie prezydenta.
Na hetym tydni Tureččyna i ZŠA damovilisia ab prypynieńni vajennaj aperacyi Ankary na poŭnačy Syryi. Časovaje spynieńnie ahniu pavinna było praciahnucca 120 hadzin, kab kurdzkija ŭzbrojenyja farmavańni zmahli pakinuć rajon vajennych dziejańniaŭ. Adnak napiaredadni abodva baki kanfliktu na poŭnačy Syryi — Tureččyna i syryjskija kurdy — abvinavacili adzin adnaho ŭ parušeńni režymu spynieńnia ahniu.
