Rasijanka Bahačova, jakuju zatrymlivali ŭ Minsku pa zapycie ZŠA, znachodzicca na voli
Na fota Hanna Bahačova (u centry) z pres-sakratarom «Ruskaha vobrazu» Jaŭhienijem Valajevym (pieršym źleva), treci źleva — kiraŭnik Rumoła Siarhiej Łušč, telehram-kanał Paradačak
Hanna Bahačova, jakaja była zatrymanaja ŭ Minsku, znachodzicca na voli.
Pra heta paviedamlaje RIA Naviny sa spasyłkaj na pasolstva Rasii ŭ Minsku.
Paźniej infarmacyju ŭ svaim telehram-kanale paćvierdziła MUS.
«Hanna Bahačova była zatrymanaja ŭ adnoj z haścinic horada Minska, bo znachodziłasia ŭ mižnarodnym vyšuku. Va ŭstanoŭlenym paradku materyjały byli pieradadzienyja dla vyvučeńnia i pryniaćcia rašeńnia ŭ prakuraturu. U ciapierašni čas jana adpuščanaja», — adznačaje MUS.
Pra zatrymańnie Hanny Bahačovaj u Minsku stała viadoma ranicaj 15 kastryčnika. Paźniej infarmacyju paćvierdzili ŭ MZS Rasii; člen Hramadskaj pałaty Alaksandr Malkievič udakładniŭ, što žančynu zatrymaŭ Interpał pa zapycie ZŠA ŭ ramkach spravy ab umiašańni Rasii ŭ amierykanskija prezidenckija vybary 2016 hoda.
Hanna Bahačova — supracoŭnica pieciarburhskaha «Ahienctva internet-daśledavańniaŭ» (h.zv. «fabryki trolaŭ») — razam ź jašče 12 rasijanami abvinavačvajecca Miniustam ZŠA va ŭmiašańni ŭ amierykanskija vybary. Siarod abvinavačanych fihuruje biznesmen Jaŭhien Pryhožyn, što, jak i Bahačova, znachodzicca pad sankcyjami ZŠA. Amierykanskija ŭłady źviazvajuć «Ahienctva internet-daśledavańniaŭ» sa strukturami, jakija majuć dačynieńnie da Pryhožyna.
