U Biełarusi raście razryŭ u apłacie pracy mužčyn i žančyn. U śfiery IT heta 40 pracentaŭ!
U Biełarusi raście razryŭ u apłacie pracy mužčyn i žančyn. Kali ŭ 2005 hodzie jon składaŭ 20,9%, to letaś — 27,3%.
Zdymak nosić ilustracyjny charaktar. Fota z sajta Wargaming.com.
«Roźnica ŭ apłacie zachoŭvajecca, jak u pieravažna mužčynskich, tak i ŭ žanočych prafiesijach», — raskazała navukovaja supracoŭnica centra ekanamičnych daśledavańniaŭ BEROC Maryja Akułava padčas sieminara ab mierach padtrymki žančyn na rynku pracy.
Kali hladzieć na najbolš vysokaapłatnych supracoŭnikaŭ, to razryŭ u zarobkach pieravyšaje 35%. Pryčym 26,7% ź ich nielha patłumačyć adukacyjaj, vopytam ci prafiesijaj.
Cikava, što ŭ pryvatnym siektary roźnica ŭ zarobkach mužčyn i žančyn nižejšaja, čym u dziaržaŭnym.
«Tut adnoj z pryčyn moža być toje, što, vierahodna, u bolš kvalifikavanych žančyn jość stymuł sychodzić u pryvatny siektar, tamu što heta adziny sposab dla ich padtrymlivać ustojlivy i dobry ŭzrovień dachodu dla siabie i svajoj siamji», — miarkuje daśledčyca.
Samy vialiki razryŭ u apłacie pracy za 2018 hod naziraŭsia ŭ siektary IT — 40%. A samy nizki — u halinie transpartu i łahistyki (6%).
Pryčyn roźnicy ŭ zarobkach šmat. Maryja Akułava pieraličvaje tolki niekatoryja ź ich:
«Žančyny vybirajuć mienš apłatnyja haliny, jakija dazvalajuć im bolš hnutki hrafik pracy — svajho rodu płata za toje, što źjaŭlajecca bolš mahčymaściaŭ vykonvać damašniuju rabotu. Taksama heta niedachop STEM-adukacyi. I toje, što ŭ nas usio roŭna isnuje istotny pierakos u toj adukacyi, jakuju abirajuć mužčyny i žančyny paśla škoły».
Zdymak nosić ilustracyjny charaktar. Fota Voli Aficeravaj.
«A chto siońnia nie puskaje maładych dziaŭčat u inžyniery ci IT-śpiecyjalisty? Takich ža abmiežavańniaŭ niama, — zaŭvažaje načalnik upraŭleńnia palityki zaniataści Ministerstva pracy i sacabarony Aleh Tokun. —
Ciapier kažuć: pavinny u IT pracavać 50% mužčyn i 50% žančyn, u šachtach — 50 na 50. A dla čaho my tak robim, ci jość zapyt ad hramadstva na heta? Kab była prosta niejkaja mifičnaja roŭnaść?
Pavinna być ekanamičnaja efiektyŭnaść. I ludzi pavinny zajmacca lubimaj spravaj».
Apytanka
