Na polska-biełaruskaj miažy ahitujuć zapisvacca ŭ pierapisie palakami
Aktyvisty fonda «Młode Kresy», zarehistravanaha ŭ Polščy, 5 kastryčnika z polskaha boku miažy ŭ Kuźnicy ahitavali biełaruskich hramadzian, jakija stajali ŭ čarzie ŭ punkt propusku, zapisvacca ŭ pierapisie nasielnictva palakami, paviedamlaje Hrodna.life sa spasyłkaj na kresy.pl.
Aktyvisty razdavali ŭlotki ź infarmacyjaj ab pierapisie i zaklikami zajavić u čas pierapisu pra svaju polskuju nacyjanalnaść. Svaju akcyju jany nazvali «Pamiętam kim jestem» («Pamiataju chto ja»).
«Kali jany ŭ niejkaj stupieni adčuvajuć siabie palakami, to niachaj zapišucca palakami», — skazała žurnalistam TVP Białystok aktyvistka fonda «Młode Kresy» Evelina Padhorna, jakaja sama rodam sa Lvova.
Na hetym tydni aktyvisty płanujuć taksama razdavać ulotki na adnym ź litoŭska-biełaruskich punktaŭ propusku.
Da pačatku pierapisu aktyvisty rasklejvali ŭ biełaruskich rehijonach, dzie žyvie vialikaja polskaja nacyjanalnaj mienšaść, nalepki i płakaty padobnaha źmiestu. Ahitacyjnyja materyjały źjavilisia ŭ Hrodnie, Lidzie, Ščučynie, Vaŭkavysku, Voranavie i Iŭje. Krytyku ŭ internecie vyklikała nalepka z Kanstancinam Kalinoŭskim na «Karcie palaka» i podpisam «Ja palak».
Fond «Młode Kresy» zarehistravany ŭ Polščy. Jaho stvaryła ŭ 2017 hodzie moładź, jakaja pryjechała tudy vučycca ź Biełarusi, Litvy i Ukrainy.
Staršynia fondu Mirasłaŭ Kapcevič kaža, što źjechaŭ ź Biełarusi ŭ Polšču z-za pieraśledu z boku milicyi i KDB, jakim nie padabałasia jaho hramadskaja dziejnaść.
«My chočam, kab polskaść u Biełarusi žyła, my chočam razmaŭlać na rodnaj movie, viedać svaju kulturu, svaju tradycyju. Kali nas budzie ŭsio mienš, to ŭžo nie budzie ani movy, ani kultury», — patłumačyŭ Mirasłaŭ.
