Statkievič na karecie, vohnišča z paśviedčańniaŭ i parvany partret Pucina: jak prajšoŭ pikiet apazicyi la Ratušy
Mikałaj Statkievič i jahonaja niezarehistravanaja «Narodnaja Hramada» brali aktyŭny ŭdzieł u parłamienckaj kampanii. Šmat pradstaŭnikoŭ «NH» byli zarehistravanyja pretendentami ŭ kandydaty, a sam Statkievič jeździŭ pa krainie, kab pryniać udzieł u pikietach.
Zdajecca, palityk asabliva nie chavaŭ, što jahonaja meta — heta nie dadzienaja kampanija, a mabilizacyja ludziej u svaju kamandu na prezidenckija vybary. Statkievič nazvaŭ ličbu ŭ try tysiačy čałaviek, jakija zapisalisia da jaho. Adzinaja detal: spadar Mikałaj pakul nie moža bałatavacca ŭ prezidenty.
Vyrašalnym punktam parłamienckaj kampanii byŭ pryznačany zbor 6 kastryčnika na placoŭcy la Ratušy ŭ minskim Vierchnim horadzie. Ahułam na zaklik Statkieviča adreahavali kala 100 čałaviek.
Heta byli aktyvisty jahonaj «Narodnaj Hramady», chłopcy z «Maładoha frontu», niekalki čałaviek z «Jeŭrapiejskaj Biełarusi», Pavieł Sieviaryniec, Viačasłaŭ Siŭčyk, mastak Aleś Maračkin, anarchisty.
Cikava, što sama placoŭka la Ratušy była pierakrytaja, bo prybirali scenu, na jakoj prachodziać usie mierapryjemstvy ŭ Vierchnim horadzie. Udzielniki akcyi vielmi zakonapasłuchmiana zaniali miesca krychu zboku, kala haradskoj skulptury z końmi i karetaj. Mienavita hetuju skulpturu ŭdzielniki abrali miescam, ź jakoha jany źviartalisia da ŭdzielnikaŭ.
Sam Statkievič nazvaŭ heta tačankaj, tolki skardziŭsia na toje, što nie było kulamiota.
Lidar pratestu adznačaŭ, što napiaredadni ŭdzielnikaŭ pałochali milicyjaj. «Jany nas bajacca bolš, čym my ich. Ja abjeździŭ usiu krainu. Nas miljony, 90-95% ludziej suprać Łukašenki», — pa-revalucyjnamu pačaŭ svaju pramovu Statkievič.
Jon adznačyŭ, što pačaŭsia prodaž krainy. «Łukašenka kaža, što ja nikoli nie pradam krainu, ale mnie raskazvali historyju, jak na kirmašy ŭ Zelvie stajaŭ stary cyhan z kabyłaj. «Nikoli nie pradam hetuju kabyłu, takaja jana dobraja», — kaža jon. Ale navat samy apošni durań razumieŭ, što kabyła idzie na prodaž», — davaŭ džazu Statkievič.
Na zadnim fonie bieł-čyrvona-biełyja ściahi trymali «maładafrontaŭcy». Kaliści ŭ vajskovym kamuflažy chadziŭ tolki lidar arhanizacyi Dzianis Urbanovič, a ciapier usie «mf-aŭcy» pierachapili hetuju modu, u tym liku i školnik Iłaryjon Trusaŭ. Darečy, Iłaryjon taksama padymaŭsia na «tačanku». U jahonych pramovach čuvać słovy Sieviarynca: «Dziakuj Hospadu, što jon daje nam mahčymaść tut źbiracca pad ściaham Chrysta». Skažycie, ničoha nie nahadvaje?
Trusaŭ vyklikaŭ stanoŭčuju reakcyju ŭ prysutnych, potym mnohija padychodzili da jaho i dziakavali.
A Nina Bahinskaja, na palito jakoj byli pryšytyja słovy «Svabodu narodu», skazała, što zmahary za niezaležnaść byli, jość i buduć. I ŭ jakaści apošniaha pryviała ŭ prykład jakraz Iłaryjona.
Vystupiŭ na dadzienaj akcyi i Pavieł Sieviaryniec. Pačaŭ jon z pramovy pra palitviaźniaŭ. Maŭlaŭ, pieršasnaje siońnia — heta patrabavać ich vyzvaleńnia. Pry hetym Sieviaryniec nazyvaŭ i dastatkova supiarečlivyja asoby, jak Tarasa Avatarava, jaki kaliści vajavaŭ za niezaležnaść Ukrainy, a potym jaho złavili na minskim vakzale sa zbrojaj.
Sieviaryniec malavaŭ apakaliptyčnuju karcinu. Kazaŭ, što zarobki ŭ kałhasach jahonaj rodnaj Viciebskaj vobłaści składajuć pa 40-50 rubloŭ, a astatniaje płaciać miasam ci inšymi praduktami.
Pavodle Sieviarynca, ludzi z uschodu Biełarusi jeduć na zarobki ŭ Rasiju, a z zachadu — u Polšču. Biełaruski les vyrubajecca na novyja rezidencyi Łukašenki, a taksama na handal ź Jeŭropaj. «Biełaruś pieraŭtvarajecca ŭ pamyjku Kramla i Kitaja», — skazaŭ Pavieł. U vyniku jon zaklikaŭ rychtavacca da abarony niezaležnaści słovami: «Nas mała, nie čakajcie litaści».
Kali Sieviaryniec skančvaŭ pramovu, to na karetu zalez Dzianis Urbanovič z patretam Pucina ŭ rukach. Jon parvaŭ hetuju papierku na drobnyja kavałki.
Pradstaŭnik «Jeŭrapiejskaj Biełarusi» Maksim Viniarski anansavaŭ nastupny pikiet 7 kastryčnika la hatela «Maryjot», dzie projdzie forum «Minski dyjałoh».
Niejki čas da maładafrontaŭcaŭ sprabavaŭ pryčapicca niejki pravakatar, jaki kazaŭ, što jany stajać pad nacysckim ściaham, a kali pryduć da ŭłady, to na Viciebščynie i Mahiloŭščynie pačnuć zabivać ruskich. «Tamu vas nichto nie padtrymlivaje», — kryčaŭ jon. Dziadźku nie pabili, ale paśla krykaŭ «hańba» ŭsio ž vietliva paprasili syści.
Skončyłasia ŭsio tym, što vyłučency ŭ deputaty ad «Narodnaj Hramady» spalili svaje paśviedčańni ab rehistracyi siabroŭ inicyjatyŭnych hrup. «Kazły nie hulajem!» — zakryčaŭ paplečnik Statkieviča Valancin Trocki. U hety momant na płoščy zahučaŭ bieśśmiarotny chit hurtu «Leninhrad» «Vybary, vybary, kandydaty p…ry».
Čaho tolki nie źmiašałasia hetym chałodnym kastryčnickim dniom u minskim Vierchnim horadzie.
