Prajści internet-pierapis i paznačyć biełaruskuju movaj rodnaj možna za niekalki chvilin — voś jak
U Biełarusi pačaŭsia pierapis nasielnictva. Jon pravodzicca kožnyja 10 hadoŭ i dazvalaje mieć aktualnuju statystyčnuju infarmacyju pra hramadstva.
Sioleta ŭpieršyniu možna prachodzić pierapis u internecie. Voś jak heta zrabić.
1. Spačatku treba zajści na sajt Census.by (pa zmoŭčańni adkryvajecca ruskamoŭnaja viersija, ale jość i biełaruskamoŭnaja).
2. Abrać knopku «pierapisacca». Kab paŭdzielničać, treba prajści identyfikacyju. Kali vy niekali rehistravalisia ŭ mižbankaŭskaj sistemie, možna ŭvajści praź jaje parol. Ale ja abraŭ atrymańnie adnarazovaha kodu.
3. Daviałosia ŭkazać svoj mabilny numar. Adrazu ž na jaho pryjšła sms-ka: «Uvaha! Nikomu nie razhałošvajcie svoj parol. Časovy parol: _____». Kali ŭvieści jaho pravilna, adkryjecca ankieta.
Imia i proźvišča ŭ joj užo ŭviedzienyja pa-rusku, ale možna ŭručnuju pierapisać pa-biełarusku.
4. Pytańniaŭ nie nadta šmat i jany zvyčajnyja. Pra pamier zarobku, naprykład, nie pytajucca.
Spačatku ŭkazvajecca bazavaja infarmacyja pra miesca pražyvańnia — płošča kvatery, ci jość kanalizacyja.
Paśla treba vyznačycca, kolki ŭ vašym domie ci kvatery «domahaspadarak». Inšymi słovami, kolki pražyvaje siemjaŭ.
Kali muž z žonkaj raźviedzienyja, ale ŭ kožnaha svoj chaładzilnik i hatujuć jany paasobku, to heta dźvie domahaspadarki. Kali ŭsio jašče jaduć razam, to adna.
Možna adznačać, što ty žyvieš razam z žonkaj, choć i ŭ «niezarehistravanych adnosinach». Za košt roznaj traktoŭki hetaha momantu i atrymajecca ŭ vyniku statystyčny chib — kolkaść žančyn zamužam zaŭsiody bolšaja za kolkaść žanatych mužčyn.
Šmat punktaŭ pryśviečanyja mihracyi — kali pryjechali ŭ ciapierašniaje miesca pražyvańnia, ź jakoj metaj, dzie žyli raniej? Ci źbirajeciesia źmianiać pracu, ci źbirajeciesia pierajazdžać? Kali ŭ vašym žyćci ŭsio stabilna, hetyja pytańni prapuściacca.
Jość i niekalki hiendarnych pytańniaŭ. U žančyn pytajucca, ci naradžali jany dziaciej i kolki źbirajucca naradzić.
Nu i nie zabyvajcie ŭkazać rodnuju movu. Biełaruskuju, jak vidać na skrynšocie.
5. Nastupny błok pryśviečany sielskaj haspadarcy. Ale jon tolki dla tych, chto maje ŭ vałodańni ziamielnyja ŭčastki albo sielskahaspadarčych žyvioł. Sabak i katoŭ pierapisvać nie treba.
6. Naprykancy Biełstat prapanuje adpravić ankietu i vydaść elektronnaje paćviardžeńnie: «Dziakuj za ŭdzieł u pierapisie».
Pa stanie na 00:50 4 kastryčnika ŭ pierapisie ŭziali ŭdzieł 1 268 čałaviek.
Pierapisny list z usimi pytańniami pa-biełarusku možna pahladzieć tut (PDF).
Čytajcie: Startuje pierapis nasielnictva. Try sposaby, jak u im paŭdzielničać
