Junyja zakładčyki narkotykaŭ z Homiela atrymali pa 10 hadoŭ kałonii
Sud Savieckaha rajona Homiela vynies pastanovu pa spravie ab raspaŭsiudzie psichatropnych rečyvaŭ. 17-hadovuju školnicu Kaciarynu i jaje 18-hadovaha pryjaciela Stanisłava pakarali 10 hadami pazbaŭleńnia voli kožnaha, paviedamlaje Radyjo Svaboda.
Treciaha fihuranta spravy, 19-hadovaha Andreja, sud z ulikam amnistyi pakaraŭ 2 hadami «chimii» biez nakiravańnia va ŭstanovu adkrytaha typu.
Kaciaryna i Stanisłaŭ zajaŭlali na sudzie, što ščyra raskajvajucca. Ichnyja advakaty prasili nie karać stroha padletkaŭ i pierakvalifikavać častku 4 artykuła 328 Kryminalnaha kodeksa na č.3 — prybrać z abvinavačańnia kvalifikacyju «ŭ składzie arhanizavanaj złačynnaj hrupy». Sud nie prysłuchaŭsia da hetych prośbaŭ.
Na momant zatrymańnia Stanisłavu było 17 hadoŭ, jon vučyŭsia ŭ kaledžy. Jahonaja 16-hadovaja siabroŭka Kaciaryna vučyłasia ŭ 11-j klasie. Pavodle abvinavačańnia, niepaŭnaletnija ŭ składzie złačynnaj hrupy zajmalisia raspaŭsiudam psichatropnych rečyvaŭ. Na sudzie Stanisłaŭ tłumačyŭ, što «pracu» pa raspaŭsiudžvańni psichatropnych rečyvaŭ znajšoŭ, zaŭvažyŭšy hrafici na ścianie z adrasam internet-kramy. Jon rabiŭ zakładki ŭ Homieli, Rečycy i Mahilovie. Zadańni, instrukcyi, mietady kanśpiracyi niepaŭnaletni atrymlivaŭ ad «niavyznačanaj asoby». Hetaja ž asoba — «kuratar» pad nikam «Bacia» — pieraličvała niepaŭnaletniamu hrošy.
Stanisłaŭ «pracavaŭ minieram» ź vieraśnia da listapada 2018 hodu. Siabroŭka dałučyłasia 24 vieraśnia. 21 listapada abaich zatrymała milicyja.
