Što viadoma pra situacyju ŭ Azaryčach, dzie śviatara padazrajuć u zabojstvie žonki
Ranicaj 2 kastryčnika byŭ zatrymany nastajaciel chrama Cviatych Apostałaŭ Piatra i Paŭła, jaki znachodzicca ŭ Azaryčach (Kalinkavicki rajon). Heta ijerej Hieorhij Ahijevič. Jaho padazrajuć u zabojstvie žonki Taćciany.
Ahijeviču 47 hadoŭ. Jon naradziŭsia ŭ vioscy Rubiel Stolinskaha rajona, skončyŭ Łuninieckuju prafiesijna-techničnuju vučelniu ŭ 1990 hodzie.
Paśla pajšoŭ u śviatary, advučyŭšysia ŭ Viciebskaj duchoŭnaj vučelni. Žonka śviatara rodam z toj ža vioski, što i muž.
Taćciana Ahijevič
U pary dvoje darosłych dziaciej. Dačka žyvie ŭ Minsku, syn pracuje na budoŭli AES u Astraŭcy.
Pa čutkach, paśla zdareńnia Ahijevič sam vyklikaŭ milicyju. A pierad hetym nibyta pazvaniŭ synu.
«Naša Niva» źviazałasia z synam Hieorhija Ahijeviča, ale jon admoviŭsia ad kamientaroŭ.
«Ja nie mahu skazać, ci sapraŭdy vinavaty baćka. U hetym raźbiarucca śledčyja», — paviedamiŭ Dźmitry Ahijevič.
Žonka śviatara zajmałasia raspaŭsiudam kaśmietyki «Aryfłejm», a taksama była dyjetołaham, dapamahała žančynam skinuć vahu.
Praŭda, jak paviedamili svajaki siamji, da zaniatkaŭ žonki śviatar pretenzij nie mieŭ: «U ich była charošaja siamja. Prablem nie było, muž Taćcianu padtrymlivaŭ».
«Jany žyli vydatna, duša ŭ dušu. Paŭsiul razam, zaŭsiody. Pra niejkija prablemy ŭ siamji Taćciana nikoli nie kazała. Pra prablemy z ałkaholem u jaje muža ja taksama nikoli nie čuła. Što mahło stać pryčynaj, nichto i ŭjavić nie moža. Hieorhij — vydatny čałaviek. Dobry śviatar», — charaktaryzuje siamju Ahijevičaŭ blizkaja siabroŭka zahinułaj.
Śledčy kamitet paviedamiŭ, što padčas zatrymańnia śviatar byŭ pjany. Svajaki kažuć, što Ahijevič amal nie piŭ: «Chiba troški na Novy hod, čysta simvalična. Byŭ suprać ałkaholu».
Carkva ŭ Azaryčach.