U Słucku zatrymali Ihara Słučaka
A 13-j hadzinie 1 kastryčnika milicyjanty ŭ Słucku zatrymali Ihara Słučaka i Juryja Pivavarčyka — kiraŭnika i čalca inicyjatyŭnaj hrupy pa vyłučeńni palittechnołaha Aliny Nahornaj kandydatkaj u deputaty Pałaty pradstaŭnikoŭ, piša Radyjo Svaboda.
Supracoŭniki milicyi, jak skazaŭ Svabodzie Słučak, prasili ŭ ich paśviedčańni i padpisnyja listy. Aktyvisty pakazali dakumienty, ale abodvuch usio roŭna zabrali ŭ RAUS, zajaviŭšy, što jany stajali «tam, dzie nielha stajać». Słučak kaža, što stajali jany nie ŭ zabaronienym dla pikietaŭ miescy — kala Doma kultury.
Aktyvistaŭ adpuścili praź dźvie z pałovaj hadziny i nie vystaŭlali nijakich abvinavačańniaŭ. Ale, adznačaje Słučak, u Biełarusi «nie časta zatrymlivajuć inicyjatyŭnyja hrupy».
Jon pryznaje: metaj akcyi byŭ nie zbor podpisaŭ. Sama Nahornaja nie źbirajecca vyłučacca ŭ deputaty, a inicyjatyŭnyja hrupy rehistravalisia, kab pravieści daśledavańnie i zładzić pikiety za pomnik udzielnikam Słuckaha paŭstańnia 1920 hoda (kampanija tak i zaviecca: #ZaPomnik).
Na pikiecie aktyvisty razdavali paštoŭki z QR-kodam (adna takaja ŭžo była ŭ RAUS), jaki viadzie na hałasavańnie na sajcie 1920.by, dzie naviednikam prapanujuć paŭdzielničać u vybary varyjantu pomnika Słuckim paŭstancam.
Aktyvisty taksama šukajuć miesca dla pomnika. I haradskija ŭłady, i relihijnyja ŭstanovy admovilisia dać terytoryju dla takoha ŭšanavańnia Słuckaha zbrojnaha čynu, tamu nadzieja tolki na pryvatnyja terytoryi.
