Dubaviec: Pieravoz Kalinoŭskaha ŭ Biełaruś desakralizuje jahony podźvih
Pierapachavańnie pareštak Kastusia Kalinoŭskaha ŭ Biełarusi vyhladaje jak čystaj vady ŭkid, na jaki paddalisia pavažanyja padpisanty. Jaŭna nia ichnaja heta zaduma, piša ŭ svaim błohu na Radyjo Svaboda Siarhiej Dubaviec.
Pa-pieršaje, ni ŭ koha niama vizii hetaha pierapachavańnia: dzie, kim, u jakim «farmacie». Chto ŭ Miensku choča, chto ŭ Śvisłačy, chto na mohiłkach, chto na płoščy — pierakanany, što sprečka pa kožnym punkcie raskole šanoŭnuju hramadu, źviadzie temu nacyjanalnaha hieroja № 1 da mituśni naščadkaŭ vakoł jahonaha imia.
Pa-druhoje, ciapierašnija aficyjnyja kancepty historyi nie pakidajuć dla Kalinoŭskaha miesca. Skasavańnie ordena jahonaha imia ŭ 2004-m, zapisvańnie jaho ŭ palaki… Navat samaje aktualnaje pasłańnie hieroja ciapier u Biełarusi niemahčyma pracytavać biez kupiur: «Tolki tady, narodzie, zažyvieš ščaśliva, kali nad taboj m…la ŭžo nia budzie».
Pachavaŭšy Kalinoŭskaha ŭ Biełarusi (a biez uładaŭ hetaha nie adbudziecca), aficyjoz pasprabuje tym samym uvohule zakryć temu nacyjanalnaha hieroja № 1.
Heta budzie paŭtornaje pachavańnie «na terytoryi rasiejskaha harnizonu», kab nie dapuścić pałomnictva da mahiły, jak toje ŭpieršyniu adbyłosia ŭ 1864 hodzie. Kalinoŭskaha ŭłady panična bajacca, jak Pucin baicca šamana. I inicyjatyva ź pierapachavańniem u Biełarusi nahadvaje vykradańnie z metaju źniščyć.
Pa-treciaje. «Sakralnuju śmierć», pra jakuju kaža Zianon Paźniak, Kalinoŭski pryniaŭ na Łukiskaj płoščy ŭ Vilni — i heta znakavaje miesca biełaruskaj historyi. Pachavali Kalinoŭskaha ŭ bratniaj mahile na Zamkavaj hary ŭ Vilni — jašče adno znakavaje miesca. Doŭhi čas litoŭcy śćviardžali, što nijakaha pachavańnia tam niama. Ale paŭstancy sami vyjšli z mahiły. Hara abrynułasia. I siońnia heta znakavaja padzieja biełaruskaj historyi.
Zaplanavana pierapachavańnie paŭstancaŭ na mohiłkach Rosy — jašče adnym znakavym miescy, dzie spačyvajuć hieroi niesavieckaj biełaruskaj historyi. Pieravoz Kalinoŭskaha ŭ Biełaruś desakralizuje i jahony podźvih, i jahonaje imia, i ŭsie hetyja źviazanyja ź im miescy.
Na maju dumku, nia varta ŭ takoj nadzvyčaj datklivaj i adnačasova hłybokaj temie «hrymieć kostkami». Lepš by šanoŭnyja padpisanty vykazalisia za zbližeńnie Biełarusi z Eŭraźviazam. Bližej było b i Kalinoŭskamu, i da Kalinoŭskaha.