Va Uźbiekistanie abmiežavali kolkaść haściej i čas praviadzieńnia viasiellaŭ
Va Uźbiekistanie zaćvierdzili pałažeńnie pra paradak praviadzieńnia viasielnych, siamiejnych, jubilejnych uračystaściej, a taksama siamiejnych paminalnych abradaŭ i inšych mierapryjemstvaŭ pamiaci niabožčykaŭ, paviedamlaje Radio Azatłyk.
Pavodle dakumienta, ciapier usie siamiejnyja mierapryjemstvy, za vyklučeńniem pachavańnia, pavinny pravodzicca ŭ adzin dzień u pieryjad z 06:00 da 23:00. Praviadzieńnie siamiejnych mierapryjemstvaŭ paśla 23:00 nie dapuskajecca, ale haradskija i rajonnyja saviety mohuć vyznačać asobna čas pačastunku płovam «u zaležnaści ad miascovych umoŭ».
Kolkaść haściej na siamiejnych uračystaściach nie moža pieravyšać 200 čałaviek, a ŭ pačastunku płovam, źviazanym z hetymi mierapryjemstvami, mohuć brać udzieł tolki da 250 haściej.
U dvajnym viasielli mohuć udzielničać da 250 haściej, na płoŭ — da 300.
Kali na siamiejnych mierapryjemstvach płanujecca bolš za 50 udzielnikaŭ, to z załaj, kafe abo restaranam pavinien składacca dahavor.
Na viasiellach, uklučajučy cyrymoniju dziaržaŭnaj rehistracyi šlubu, a taksama pryjezd i adjezd žanicha i niaviesty ŭ viasielnuju zału, nie dazvalajecca vykarystoŭvać bolš za try lehkaviki.
Zaprašać na siamiejnaje mierapryjemstva možna budzie nie bolš za dva vykanaŭcy ci muzyčnyja hurty, pry hetym z artystami pavinien składacca dahavor.
Transpartnyja pasłuhi na siamiejnych mierapryjemstvach (za vyklučeńniem pachavańnia) pavinny akazvać licenzavanyja pieravozčyki.
Mierapryjemstvy, źviazanyja z pachavańniem, mohuć doŭžycca nie bolš za try dni. Ale kolkaść haściej na ich zakon nie abmiažoŭvaje.
Administracyja kafe i restaranaŭ pavinna budzie piśmova apaviaščać orhany ŭnutranych spraŭ ab płanavanych uračystaściach nie paźniej čym za dva dni da mierapryjemstva.