Biełaruski Robin Hud: minčuk atrymaŭ rekvizity kart zamiežnikaŭ, nabyvaŭ praź ich bienzin i pradavaŭ tańniej zvyčajnym ludziam. Abjomy fantastyčnyja
Apieratyŭnikami ŭpraŭleńnia pa raskryćci złačynstvaŭ u śfiery vysokich technałohij HUUS Minharvykankama spyniena supraćpraŭnaja dziejnaść 24-hadovaha minčuka, jaki kraŭ hrošy z bankaŭskich kart zamiežnych hramadzian. Historyju raspaviadaje ŭ svaim telehram-kanale pres-sakratar MUS Volha Čamadanava.
Pravaachoŭniki ŭstanavili, što dostup da rekvizitaŭ kart, emitavanych bankaŭskimi ŭstanovami ZŠA, Brazilii, Izraila, chłopiec atrymaŭ dziakujučy internetu, dzie z vykarystańniem kryptavaluty nabyŭ ich u adnym sa śpiecyjalizavanych mahazinaŭ.
Zatym jon staŭ zajmacca prodažam paliva pa vyhadnaj dla ludziej canie.
Uładalniki kart navat nie padazravali, što ź ich rachunkaŭ zdymajucca hrošy, a chłopiec, vykarystoŭvajučy mabilnyja dadatki AZS, unosiŭ źviestki kart zamiežnikaŭ i nabyvaŭ paliva. Paśla paliva jon pradavaŭ tańniej jak svaim znajomym, tak i zvyčajnym hramadzianam.
Pavodle apieratyŭnaj infarmacyi, usiaho z vykarystańniem hrašovych srodkaŭ hramadzian ZŠA, Brazilii, Izraila i inšych zamiežnych dziaržaŭ, jamu ŭdałosia nabyć kala 15 000 litraŭ paliva na 90.000 rubloŭ.
