Navapołacki doktar zadušyŭ kachanuju i zabiŭ siabie — padrabiaznaści trahiedyi ŭ Malinaŭcy
Žudasnaja historyja adbyłasia 15 vieraśnia ŭ Minsku. U adnym z damoŭ pa vulicy Rafijeva mužčyna zadušyŭ svaju znajomuju. Paśla paviedamiŭ pra ŭčynak svajakam — i ździejśniŭ suicyd.
«Naša Niva» vyśvietliła niekatoryja padrabiaznaści historyi.
Mužčynu zavuć Alaksandr Baroŭka. Jamu było 59 hadoŭ.
Baroŭka nie minčuk — jon žyŭ u Navapołacku, dzie pracavaŭ u Centralnaj haradskoj balnicy. Raniej pracavaŭ chirurham, byŭ namieśnikam hałoŭnaha doktara pa miedycynskaj častcy, navat niekatory čas vykonvaŭ abaviazki hałoŭnaha doktara.
Paśla Baroŭka byŭ chirurham u Dokšycach, a zatym viarnuŭsia ŭ Navapołack i apošni hod pracavaŭ doktaram-transfuzijołaham na stancyi pieralivańnia kryvi.
Baroŭka byŭ raźviedzieny, jaho byłaja žonka pracuje ŭ toj ža navapołackaj balnicy.
Tut, u balnicy, Alaksandr i paznajomiŭsia z Alenaj Šando. Jana była miedsiastroj apieracyjnaha adździaleńnia. «U ich zaviazaŭsia raman, pra heta ŭsie viedali», — kažuć znajomyja Aleny.
Ale sioleta Alena Šando pierabrałasia ŭ Minsk. Pierajechała pa svajoj inicyjatyvie, uładkavałasia ŭ kliniku, taksama miedsiastroj. U Minsku žyŭ i darosły syn Aleny.
Na vychodnych Baroŭka pryjechaŭ da kachanaj. Chodziać čutki, što jon admysłova jechaŭ vyśvietlić adnosiny. Čym skončyłasia — viadoma.
«15 vieraśnia 59-hadovy mužčyna, znachodziačysia ŭ adnoj z kvater doma, zadušyŭ 46-hadovuju znajomuju. Paśla čaho adpraviŭ paviedamleńnie svajakam i skončyŭ žyćcio samahubstvam», — paviedamiŭ Śledčy kamitet.
Praŭda, dakładnyja pryčyny takoha strašnaha ŭčynku ahučyć nichto nie moža. «Naša Niva» źviazałasia sa svajakami zahinułych, ale jany nie adkazali, što mahło padšturchnuć Alaksandra na jaho dziejańni.
Alaksandra Baroŭku i Alenu Šando pachavali 18 vieraśnia.
