Siłaviki zacikavilisia top-mieniedžarami ałkaholnych zavodaŭ
Na minułym tydni siłaviki pryjšli z pravierkami na niekalki zavodaŭ, jakija vyrablajuć ałkaholnuju pradukcyju. U vyniku było zatrymana niekalki top-mieniedžaraŭ. Infarmacyju nie ab usich ź ich udałosia paćvierdzić, piša tut.by.
Viadoma, što byŭ zatrymany dyrektar AAT «Čysty vytok 1872» Źmicier Nieśmirny. Dadzienuju infarmacyju paćvierdzili dźvie infarmavanyja krynicy. Na samim zavodzie tolki skazali, što dyrektar adsutničaje na pracoŭnym miescy ź siaredziny minułaha tydnia. Nazvać jaho miescaznachodžańnie nie zmahli. Surazmoŭcy nie viedajuć, što inkryminujecca Niaśmirnamu. U pres-słužbie KDB admovilisia kamientavać infarmacyju ab zatrymańni dyrektara śpirtzavoda.
«Čysty vytok 1872» - heta novaja nazva Čašnickaha zavoda charčovych praduktaŭ (u prastamoŭi - Čašnicki śpirtzavod). U śniežni 2016 hoda heta kamunalnaje pradpryjemstva było pieraŭtvorana ŭ adkrytaje akcyjaniernaje tavarystva «Čysty vytok 1872». Razam ź dziaržavaj akcyjanieram novaha tavarystva staŭ Minski zavod vinahradnych vinaŭ. MZVV, jaki padkantrolny uładalnikam «Jeŭrahandalu», abaviazaŭsia ŭkłaści niekalki miljonaŭ dalaraŭ inviestycyj i ŭdychnuć novaje žyćcio śpirtzavodu ŭ Čašnikach.
Uźnikli pytańni z boku pravaachoŭnych orhanaŭ i da hałoŭnaha inžyniera kirujučaj kampanii «Minsk Kryštal Hrup» Alaksandra Žaryna.
Raniej pra zatrymańnie Žaryna paviedamili błohier NEXTA i šerah internet-resursaŭ. Pa słovach ich krynic, top-mieniedžaru nibyta inkryminujecca atrymańnie chabaru ŭ pamiery troch tysiač dalaraŭ.
U pryjomnaj kiraŭnika «Minsk Kryštal Hrup» skazali, što nie vałodajuć infarmacyjaj ab zatrymańni hałoŭnaha inžyniera. Inšyja jaho kalehi zapeŭnivajuć, što jon na pracoŭnym miescy, adnak tam jaho karespandentu tut.by na praciahu dvuch dzion nie ŭdałosia zaśpieć.
Alaksandr Žaryn ŭvachodzić u kamisiju «Minsk-Kryštala» pa supraćdziejańni karupcyi. Jon taksama ŭznačalvaŭ konkursnuju kamisiju pa praviadzieńni zakupak abstalavańnia, śviedčyć spravazdačnaść kampanii.
Top-mieniedžar u 2001 hodzie skončyŭ Mahiloŭski technałahičny instytut. Hałoŭnym inžynieram kirujučaj kampanii «Minsk Kryštal Hrup» byŭ pryznačany ŭ 2015 hodzie, paviedamlajecca ŭ prafajle Alaksandra Žaryna ŭ sacsietkach.
U SK i MUS nie majuć infarmacyi ab zatrymańni Žaryna. U KDB admovilisia ad kamientaroŭ.
