«Muž zahubiŭ našu siamju». Žančyna z Kobryna, jakaja atruciłasia hrybami, raskazała svaju praŭdu
vk.com
U Kobrynie siamja z troch čałaviek mocna atruciłasia hrybami. Žonka vinavacić u zdareńni pamierłaha muža, jaki, pavodle jaje, chacieŭ takim čynam nie dapuścić razvodu. Svajaki ž mužčyny nazyvajuć jaje zajavy chłuśnioj, piša belsat.eu
Bolš za tydzień tamu ŭ pryjomny pakoj Kobrynskaj centralnaj rajonnaj bolnicy samastojna źviarnulisia 24-hadovy Pavieł, jahonaja 22-hadovaja žonka Maryja z 1,5-hadavałym synam Mirasłavam. Pavodle pacyjentaŭ, jany jeli hryby, ad čaho im stała kiepska, paviedamlaje BiełTA.
Miascovaje vydańnie kobrincity.by piša, što siamja atruciłasia blednymi pahankami, pierabłytaŭšy ich ź zielanuškami.
Praź niekalki dzion paśla atručvańnia mužčyna pamior u Bieraściejskaj bolnicy. Jahonyja žonka i dzicia znachodziacca ŭ Miensku ŭ reanimacyi RNPC transpłantałohii orhanaŭ i tkanak. Im pierasadzili piečań, stan abodvuch aceńvajecca jak ciažki, paviedamlaje «Komsomolskaja pravda».
«Muž atruciŭ i zahubiŭ našu siamju»
Para znachodziłasia ŭ pracesie razvodu. I prajšła ŭžo pałovu terminu, adviedzienaha im na prymireńnie. Tym nie mienš, toj trahičny viečar muž z žonkaj praviali razam. Žančyna ŭ zdareńni abvinavaciła svajho pamierłaha muža.
«Nam užo lepiej, žyvyja! Dziakuj maim rodnym ludziam, za kłopat, u vieru ŭ nas. Ja ledź pišu, ale zaŭtra ŭ majho muža, jaki atruciŭ i zahubiŭ našu siamju «dzień pamiaci». Nie viercie sajtam dy łžyvym źviestkam», — napisała jana ŭ Instagram.
Jak raskazała maci žančyny, mienavita muž źbiraŭ i hatavaŭ hryby, jakija jon źjeŭ razam z žonkaj. Dzicia ž pakarmili hrudnym małakom.
«Zatym Maša z Pašam pajšli ŭ kłub, a ranicaj dačce stała tak drenna, što jana nie mahła vyklikać «chutkuju». Jaje pastajanna vanitavała, jana navat nie mahła ŭstać z kanapy. Paša ŭ hety momant znachodziŭsia pobač, jamu taksama było drenna, ale lekaraŭ jon vyklikaŭ tolki paśla taho, jak Maša skazała, što pamiraje», — raspaviała žančyna.
Sama Maryja adznačyła ŭ kamientary Onliner.by, što muž nieadnojčy pahražaŭ skončyć žyćcio samahubstvam, kali jany rasstanucca. Pahražaŭ zabić i syna.
Svajaki pamierłaha vinavaciać žonku ŭ chłuśni
Razam z tym siastra pamierłaha Paŭła Albina ŭ kamientary belsat.eu nazvała abvinavačvańni ŭ adras svajho brata hłupstvam.
«Maryja moža nahavaryć usio, što zaŭhodna. Taki jana čałaviek, jaje viedaje ci nie ŭvieś Kobryn… Ja nie viedaju, jakija jašče viersii jany prydumaje, kab siabie apraŭdać. Heta poŭnaja łuchta», — raskazała siastra.
Pavodle jaje, u pamierłaha ni ŭ jakim razie nie mahło być takich dumak, bo jon byŭ samy pazityŭny čałaviek u siamji.
Pavodle Albiny, Maryja ŭvieś čas dastavała i abzyvała Paŭła dy jahonych svajakoŭ, ličyła, «što jana «karaleva» i joj roŭni niama». Viersiju ž pra naŭmysnaje atručvańnie, ličyć jana, žonka vysunuła tamu, što «viedaje, što ludzi jaje zahnabiać». Na dumku Albiny, heta nie apošniaja viersija paciarpiełaj.
Nie vieryć u samahubstva Paŭła i jahonaja byłaja adnakłaśnica Maryja. Pavodle jaje, pamierły byŭ viasiołym čałaviekam i maksimum, što moh zrabić, — napužać svaju žonku. Taja ž «zaŭsiody siabie vystaŭlaje ščyraj». Razam z tym surazmoŭca adznačyła, što, kali ŭ horadzie źbirali hrošy na dapamohu siamji, Maša ŭsie hrošy zabrała sabie.
«Pašu ni kapiejki nie dała. Chaj pamiraje, skazała», — adznačyła adnakłaśnica pamierłaha.
Pavodle jaje, žonka jašče da śmierci muža mienavita jaho ličyła vinavatym.
